Altantip qulaatigoortut assoralisimaarput
Qutsissumi anorlingaatsiarnerata nassaataanik timmisartut pisarnermit avannarpasinnerusukkut takinermillu timmisalerput
Altanti qulaallugu timmisartut ingerlaarnerat piffissami matumani assoralisimaarnermik nassataqarpoq.
Atlantip imartaata qulaani 10 kilometerinik qatsissuseqartumi piffissami matumanerpiaq silaannarmi pisarnermit sarfaqarneruvoq, nalinginnaanngitsumik anorersuartut sukkatigilersartunik atlanti qulaallugu timmisartuussinernut unammillernaqalutik.
Taama Berlignske allappoq.
Qaammatip siuliani amerikamiut timmisartuutileqatigiiffiat Continental, USA'p Europallu akornanni timmisartuussinernit toqqaannartunit 1.100-nit, 43-riarlutik pilersaarutaanngitsunik akunnittariaqarlutik orserserniarlutik miffissarsiortariaqartarput.
Europami timmisartoqarfinnut anginerpaajunngitsuni soorlu Københavnip timmisartoqarfianut timmisartuussinissani Continentalip timmisartoq angerujussuanngitsoq Boeing 757 atortarpaa, taamaattoq 7.200 kilometeriinnarnik timmisinnaassuseqarpoq. Nalinginnaasumik Europap kitaanit amerikap sineriaanut kangillermut unigani timmisartorsinnaasariaqarpoq. Tamaattoqarsinnaanngilarli USA'p tungaanut aqqummi pisarnermit avannarpasinnerusukkut ingerlaartariaqalermat.
Issittup silaannartaani sarfaq sakkortooq
Danmarks Meteorologiske Institut, DMI, uppernarsineqarpoq, Atlantip imartaata qulaani issittup silaannaani sarfaq qaammatini kingullerni taamaaginnapajaarsimasoq.
- Anorip sukkassusaa ilaatigut 200 knob angusarpaa, tassa nal. ak. 400 kilometerit.
Tamatuma saniatigut silaannap kissartup nillertullu naapiffiat 1.000 kilometerisut silitsigaaq, taamaattumik timmisartut Amerikap avannaaliarniartut assumukaarujussuassanngikkunik anori avannaqqullugu kujaqqulluguluunniit uiartererujussuartariaqartarput, flyvemeteorolog Søren Brodersen, DMI, Berlingskemut oqarpoq.
Søren Brodersen naapertorlugu issittup silaannaata sarfaata sakkortuup ukioq manna Danmarkip silaannaata nerumilluni anorlerjunnera imminnut ataqatigiittut.
- Silaannaap assigiinnginnerujussui tassa Kalaallit Nunaanni isseqaluni kiisalu Europami silaannap neruminneranit anorit sakkortusisarnerat imminnut ataqatigiipput, Søren Brodersen oqarpoq.