Pisut arajutsisimavaat
- Nunatsinni Danmarkimilu naalakkersuisut utaqqisoqarneranik peqquteqartumik saammaassisinnaaneq pingaartinneqarnerunngimassuk assut uggornarpoq, Ataqssut isumaqarpoq
”Qallunaat naalakkersuisui aappaagu pinerluttunik isumaginninnerup tamakkiisup misissoqqissaarnissaanut aningaasaliisimapput, tamannalu naammagisimaarpara”.
Taama nunamut namminermut naalakkersuisoq Anthon Frederiksen qisuariarpoq, inatsisinik atortitsinermut ministerip aaqqiiniutaanut qallunaat naalakkersuisuisa utaqqisoqarnera peqqutigalugu saammaassisinnaanermik pingaartitsinnginnerannut atatillugu.
- Upernaakkut 2011-mi inatsisinik atortitsinermut ministeri pinerluuteqarsimasunut inissiisarfimmiittussatut eqqartuunneqartut utaqqineq peqqutigalugu saammanneqarsinnaanerannut tunngatillugu naalakkkersuisunut tusarniaavoq. Saaffiginnissut taanna naalakkersuisut pisortatigoortumik qisuariarfigisimanngilaat.
- Partiit tusaaniarneqarsimanngillat, aamma naalakkersuisut inatsisinik atortitsinermut minissterip saaffiginnissutaa ammasumik oqallisigitinngilaat, Steen Lynge Atassummeersoq oqarpoq.
Inatsisitigut isumannaatsuunissaq tatineqarpoq
Isumaqarpoq naalakkersuisut 2013-mi Danmarkimi naalakkersuisut aningaasaliinissaat naammagiinnaraat.
- Misissuinerup inernerata qaqugu saqqummiunneqarnissaa ullulerneqanngilaq.
- Naalakkersuisut pisut arajutsisimavaat, maannakkullu Anthon Frederiksen naalakkersuisut sinnerlugit kinguartitsiinnarnissamut akuerisaaginnarpoq. Kalaallit Folketingimut ilaasortaatitaat sumiittunuku?
- Susassaqarfiup pingaartinneqannginneratigut nunatsinni inatsisitigut isumannaatsuuneq tatineqarpoq, inuillu pisinnaatitaaffii suusupagineqarlutik, pillaatisiap qaqugu naammassineqarnissaa ullulerneqarsinnaatinnagu. Nunatsinni Danmarkimilu naalakkersuisut pingaartitsinerunngimmata ajorluinnarpoq, Steen Lynge oqarpoq.