Uiloq kalaallinit pitsaanerpaaq

Uiloq Slettemark sisorarluni ooqattaariaqattaarnermi Forni Avoltri, Italiami peqataanermini angusarissaartoq

Uiloq Slettemark kalaallinit pitsaanersaalluni Forni Avoltri, Italiami unammeqataavoq. Assi: Sermitsiaq.AG assiisivia

Uiloq Slettemark kalaallini sisorartartuni ukioq manna unamminermi siullermi Forni Avoltri Italiami pisumi pitsaanerpaamik angusaqarluni apuuppoq. Ingerlaarfimmi 15 km-isut isorartussusilimmi sisamariarlutik ooqattaasariartussaapput. Unamminissaq sioqqullugu Uiloq Tysklandimi Ruhpoldingimi sungiusaqataavoq.

Uiloq ooqattaasarnermi siullermi kukkuneqanngitsumik pallorluni ooqattaasarpoq. Oqilaniuffimmi ingerlalluarpoq ooqattaasariarneq siulleq pereermat nr. 35-ulluni. Aappassaanik ooqattaasariarami marloriarluni uniorpoq nr. 48-nngorluni. Pingajussaanik ooqattaasariarnermi ataasiaannarluni eqquivoq, kingornali oqilaniuffimmi kigaannerulluni ingerlagami nr. 60-inngorluni. Sisamassaannik ooqattaasariarnermi pingasut uniorpai, oqilaniuffillu naggammeerlugu ingerlaarfigigamiuk sukkaallivoq apuukkami nr. 74-inngorluni, Grønlands Biathlon Forbund nalunaarpoq.

Uiloq ajugaasumit Jaquemine Baud, Frankrig 21,5 pointiinnarnik kingulliuvoq ajugaasorli uniorani ooqattaasariartarpoq oqilaniunnermi minutsit 45.56 atorlugit. Uilup 56.40 minutsit atorpai tallimariarluni uniornini minutsinik tallimanik pillaatisissutigisai ilanngullugit.

- Unamminera naammagisimaarluarpara aatsaat unammiuaarfimmi uani peqataagama. VM-imut piumasaqaat qanillattorpara piumasaqaammut taama qanillattortiginissara naatsorsuutaanngikkaluarpoq takisuumik unamminermi naatsumik unamminernit assigiinngissutit ersarinnerusarmata. Ooqattaariarfissap nalaani anorlikujukkami taamaammat aallaariarnikka pingasut siulliit naammagisimaarpakka (0-2-1). Ajoraluartumik kingullermik ooqattaasariarninni uniorpunga pingasunillu pillaatisillunga. Isumaga naapertorlugu nunami 900-1000 meterimi qatsissuseqartumi unammineq ilungersunarpoq, kisiannili naammagisimaarluarpara ooqattaariarnerit pingasut siulliit 20 procentit missaannik angusaqarama.

Kalaallit Nunaannit angutit unammisut tassaapput Kristian Kristoffersen aamma Aqqaluartaa Olsen. Øystein Slettemark ajoqquseqqasoq Norgemiippoq maannakkorpiarlu unammeqataasinnaanani, Piitaaraq Skifte unamminissanut marlunnut anngutinngitsoorpoq.

Kalaallit angutitaanit Kristian Kristoffersen pitsaaneruvoq nr. 99-inngorami. Kristian katillugu tallimariarluni uniorpoq (1-3-2-0), ajugaasumit 22,8 procentimik kingusinnerulluni. Erik Lesser Tysklandimeersoq uniorani ooqattaasariartoq ajugaavoq. Kisianni Kristian Aqqaluartaamit sukkanerusumik ingerlaarpoq. Aqqaluartaa Olsen unammeqataasunit nr. 108-nngorpoq, arfineq-pingasoriarluni uniorluni, ajugaasumit 30 pointinik kingusinnerulluni.

Powered by Labrador CMS