Dronningi natersuarmik tunineqarpoq

Natersuaq qalipaatigissaaqisoq qeqqani naalagaaffiup ilisarnaataanik ilusilersugaq dronningip pigilerpaa.

Dronningi sapaammi ukiunik 40-nik nalliuttorsiornermut atatillugu natersuarmik aappalaartunik, sungaartunik tungujortunillu qalipaatilimmik tunineqarpoq.

Folketingi aamma naalakkersuisut ataatsimoorussillutik tunnissuteqartuupput natersuarmik Christiansborgimiiginnartussamik.

Ilusilersuisartoq Jenny Hansen, Hobro natersuarmik dronningi peqatigalugu suliaqartuuvoq, taamaammallu tunissut dronningimit uissuumminartuunngilaq.

Jyllandimiup ilusilersuisartup Danmarkip dronningianik suleqateqarsimanini tulluussimaarutigaa.

- Tulluussimaarnaqaaq, aatsaat aamma taama angitigisumik suliaqarama, Jenny Hansen DR'imut oqarpoq.

Natersuaq ikaartitigaasoq suliaavoq angisooq, pingaartumik annertussusaata 6 x 6 meteriunera pissutigalugu.

Folketingip tunissuteqarnerani prins Henrik, kunngissaq Frederik aamma kunngissap nulia Mary peqataapput.

Dronningi tunissuteqarfigineqarpoq, folketingimi naalaagaaffip pillugu ataatsimiinnerit 500-jussaat dronningip najuuffigereermagu.

Naak dronningi politikkimik suliaqarsinnaatitaanngikkaluarluni ileqqussat naapertorlugit naalakkersuisunut akissussaaffik tigummivaa, tamanna isumaqarpoq naalagaaffik pillugu ataatsimiinnerni aqutsisutut issiasartoq, inatsiliarineqartunik akuersisutut atsiortussaalluni taamalu atuutsinneqarnissaannik aallartitsisartuulluni.

Tallimanngornermi oqaatigineqarpoq, naalakkersuisut dronningillu naalagaaffik pillugu ataatsimiittarneri ukiap ingerlanerani amerlisarneqarsimasut, dronning Margrethe ukiunik 40-nik nalliuttorsiorneranut atatillugu naalagaaffik pillugu ataatsimiinnissat 500-ssaat ingerlanneqarsinnaaniassammat.

Taama tusarliisoqarnerata nalaani naalakkersuisoqataasut SF'ikkut politikkikkut oqaaseqartartuata Jesper Petersenip naalagaaffik pillugu ataatsimiittarnerit qanganisarpalunnerarlugit uparuarpai, ministerit dronningillu inatsisit nutaat atsiussallugit ataatsimiittarmata.

Statsminister Helle Thorning-Schmidt, Socialdemokratineersup naalagaaffik pillugu ataatsimiittarnerit unitsinnissaannik eqqarsaatersuuteqanngilaq.