5000-t hurraartuupput

Inuit 5000 missaat Københavnip Rådhuspladsiani katersuussimapput dronning Margrethep ukiuni 40-ni nalliuttorsiorneranik pilluaqquseqataaniarlutik.

Dronningi prins Henrillu Rådhusip aneerasaartarfianit aalateriniarlutik anillattullu, københavnerit nipersuartik tamaat nillerput, erinarsuummik piareersarfigisaminnik appillutik nipertillu tamaat hurraartuullutik.

Tamatuma siorna kareti kuultiusoq atorlugu Amalienborgimit Store Kongensgade aamma Strøge aqqusaarlugu ingerlaarnerminni sumi tamani inunnit amerlaqisunut pilluaqquneqarput.

Pilluaqqusisut, hurraartuuttut erfalasooralisartullu amerlaqaat.

Dronningikkut rådhusimi overborgmester Frank Jensenimit ilassineqarput. Dronningip ilagai ilaquttanilu qaninnerit, Helle Thorning-Schmidt aamma kunngikkormiut Norgemit Sverigemillu.

Tassani dronningi qaaqqusallu allat erinarsortartunit 500-nit ikinnerunngitsunit aliikkusersorneqarput. Erinarsortartut Kalaallit Nunaannit, Savalimmiunit, Islandimit Danmarkillu sinneranit aggersagaapput.

Tivoli-garden nipilersorput dronningilu pulaartut allattorsimaffianni atsioreermat borgmesterimit oqalugiarfigineqarpoq.

- Peqataaneq, ilisimasaqarneq, soqutiginninneq aamma suliamut ilisimasaqarluarneq ukiuni 40-ni ilisarnaatigaat. Dronningi katersuuffiuvoq, siuttoq maligassiuisorlu, ilaatigut Frank Jensenip oqaatigisaannut ilaapput.

Dronningip oqalugiarnermini inuppassuit Københavnimiittut qutsavigai, tamakku prins Henrillu marluullutik nalliuttorsiornerminnik peqataammata.

- Københavnimi aqqusinerni ingerlaarnerminni kissalaartumik ilassinninneqarnertik rådhusillu saavani kissalaartumik nuannersumillu ilassineqarneq tuppallissutigalugu oqarpoq.

Københavnimi politiit naatsorsuutigaat inuit 5000 miss. rådhuspladsimi dronningimut aalateriartorsimasut.

Sapaatiuppat tassaavoq ulloq taanna Margrethep angunni kong Frederik den 9. paarlallugu dronningitut suaarutigineqarfia. Tamanna sapaatip akunnera naallugu nalliussineqarpoq. Sapaammi Christiansborgimi nerersuaqatigiittoqassaaq.