Dronningi Københavnimi aqqusinernit ilassiorneqaqaaq
Dronning Margrethe karetimik ingerlateqarluni Københavnip aqqusernngisigoormat ukiuni 40-ni nalliuttorsiornera inuit nalliuttorsiutigaat
Aqquserngit inunnik dronning Margrethemik pilluaqquserusuttunik ulikkaarput, taanna prins Henrik ilagalugu kareti kultiusoq matoqqasorli hiistinit qaqortunit arfinilinnit ingerlanneqartoq Københavnip aqquserngini ingerlatigineqarmat, dronningip ukiunik 40-nik nalliuttorsiorneranut atatillugu.
Dronningikkut Amalienborgimit, Store Kongensgade Strøgelu inunnik ulikkaartoq aqqusaarlugu Københavnip Rådhusiliarput. Sumi tamani hurra aamma pilluarit tusarsaavoq erfalasuaralisartunillu ulikkaarpoq. Politiit taggippaat inuit 5000 Rådhuspladsimi dronningikkunnik ilassinnikkusullutik katersuussimasut.
Dronningikkut rådhusimi overborgmester Frank Jensenimit ilassineqarput. Dronningip ilagai ilaquttanilu qaninnerit, Helle Thorning-Schmidt aamma kunngikkormiut Norgemit Sverigemillu.
Tassani dronningi qaaqqusallu allat erinarsortartunit 500-nit ikinnerunngitsunit aliikkusersorneqarput. Erinarsortartut Kalaallit Nunaannit, Savalimmiunit, Islandimit Danmarkillu sinneranit aggersagaapput. Sapaatiuppat tassaavoq ulloq taanna Margrethep angunni kong Frederik den 9. paarlallugu dronningitut suaarutigineqarfia.