Nunatsinnit kuultimik tunissut killitsissutigaa

Kuupik Kleist aamma Josef Motzfeldt tallimanngornermi nunatsinnit naasut qilertat kuultiusut dronning Margrethemut namminneq tunniuppaat

Dronning Margrethe aamma prins Henrik, ukiunik 40-nik nalliuttorsiornissaq sioqqullugu tusagassiivinnik katersortitsinerannit assilisaq. Assi: Stine Bidstrup/Polfoto

Amalienborgimut tunissutit eqqussuunneqartut imaaginnavipput. Ukiunik 40-nik nalliuttorsiornermut atatillugu Dronningi tallimanngornermi tunissutinik tigooraavoq.

Kuupik Kleist, Josef ”Tuusi” Motzfeldt aamma kuultinik pinnersaasiortoq Nicolai Appel piffissaliussamit kingusinnerusukkut Amalienborgimut apuupput.

Taakkua dronningimi isersimanissaat sivitsorneqarpoq. Dronning Margrethe naasunik qilertanik kuultiusunik angutinit taakkunannga tunineqarpoq, nunatta kuultianik niaqorutiliarineqartussap naasortassasai.

Dronningi ilunnguvoq, naalakkersuisut siulittaasuat Kuupik Kleist oqarpoq. Josef Motzfeldt ilannguppoq:

- Ataqqinartorsuaq kusanartulianik amerlasuunik takusimasoq aatsaat taama pinnertigisumik takuvoq.

Niaqorutissaq immikkuullarilluinnarpoq kukkilinnut tallimanut immikkoortiterneqarsinnaasoq, tamarmi ujaqqanik nunatsinneersunik pinnersaateqarluni.

Nujaqutissaq kuultinik pinnersaasiortartumit Nicolai Appelimit ilusilersugaallunilu sananeqassaaq.

- Dronningi niaqorutissap naasutassaanik nammineq ikkussueqataassaaq, Nicolai Appel Sermitsiaq.AG’mut oqarpoq.

Niaqorut ukioq manna kingusinnerusukkut naammassissaaq
Naatsorsuutigineqarpoq niaqorut marsimi naammassineqassasoq. Eqqumiitsuliortoq ilusilersuisartorlu Ina Rosing aamma pequsiortoq Rasmus Fenham suleqatigiillutik niaqorutip inissaat suliarissavaat.

- Pinnersaatit inissaat orpimmit masarlummi naasartumit qisuttaqassaaq taamallu suliassinneqarnera nuannaarutigisorujussuuara, Ina Rosing oqarpoq.

- Suliassara aallartereerpara niaqorut naammassippat naammassissaanga, naggasiivoq.

Naalakkersuisut, Inatsisartut aamma Nunatsinni suliffeqarfiit tallimat dronninngimut tunissummik nalinginnaanngitsumik aningaasaliisuupput, Nunatsinnit pisortatigoortumik tunniussaasoq.

Powered by Labrador CMS