Saammaassinissaq - naaggarluinnaq

Demokraatit isumaqarmata pinerlussimasut isumakkeerfigineqanngisaannassasut pinerlussimasunut isertitsivinnut utaqqisut amerlavallaarnerat pissutigiinnarlugu, Andreas Uldum naqissusiivoq

Demokraatit isumaqarmata pinerlussimasut isumakkeerfigineqanngisaannassasut pinerlussimasunut isertitsivinnut utaqqisut amerlavallaarnerat pissutigiinnarlugu, Andreas Uldum naqissusiivoq. Assi: Leiff Josefsen

- Aallaqqaammut oqaatigilara Demokraatit isumaqarmata pinerlussimasut isumakkeerfigineqanngisaannassasut pinerlussimasunut isertitsivinnut utaqqisut amerlavallaarnerat pissutigiinnarlugu. Inatsisinik atortitsinermut ministerip taamatut siunnersuuteqarnera partiitut akerlerilluinnarparput.

- Tikkuartariaqarparput, innuttaasut isertitsivimmiittussanngorlugit pinerlussimasut tassaammata sakkortuumik pinerluuteqarsimasut. Inuit taakkua isumakkeerfigineqarnissaat peqataaffiginavianngilarput. Kalaallit Nunaanni inuiaqatigiit inatsisinik tunngavillit pineqaatissiisimanerat naammassisariaqarpaat.

Taama oqarpoq Andreas Uldum, Demokraatit sinnerlugit Inatsisartuni oqaaseqartartoq.

- Taamatut oqareerluta, qularutigineqassanngilaq, ajornartorsiutaammat angisooq, pinerlussimasunut isertitsivimmut taama amerlatigisut utaqqinerat. Tamanna tunngavigalugu pineqartoq oqallisigineqassappat ajunngilaq. Demokraatinili Naalakkersuisut ersarissumik oqariartuuteqarnissaat maqaasivarput.

Danmarkip akisussaaffia
- Aamma eqqumiigaarput Inatsisinik atortitsinermut ministerip siunnersuutaa marts 2011-mili Naalakkersuisunit tigummineqarsimammat – tassa qaammatini qulini – sunnguamilluunniit iliuuseqarfigineqarani.

Andreas Uldumip aamma oqaatigaa qularutissaanngitsoq pinerlussimasut isertitsiviini naammattunik inissaqartitsinissaq Danmarkip akisussaaffigimmagu.

- Imaanngilarli uagut maani ilorrisimaarujuussasugut utaqqillugu Danmarkimi arlaannik pisoqarnissaa. Tamanna tunngaviuvoq, uanga Naalakkersuisut ujartuiffigingakkit, utaqqisut ikilisarniarlugit qanoq isummersornersut.

- Demokraatini siusinnerusukkut eqqartornikuuarput pinerlussimasut niumikkut kalunniusamik ivertitsivigineqartalersinnaanissaat aamma tapersersorparput inuiaqatigiinni kiffartuussititsinerusalernissaq, Andeas Uldum oqarpoq.

Naalakkersuinut apeqqutit
Makku naalakkersuisunut apeqqutigai:

  • Pinerlussimasunut isertitsivinnut utaqqisut ikilisarniarlugit Inatsisinik atortitsinermut ministereqarfiup kalaallit pillakkat ilaasa isumakkeerfigineqarnissaannut siunnersuutaa Naalakkersuisut qanoq isumaqarfigaat?
  • Ulloq 1. marts 2011 Inatsisinik atortitsinermut ministereqarfiup pineqaatissinneqarsimasut isertitsivimmut utaqqisut ikilisarnissaannut siunnersuut Namminersorlutik Oqartussanut tusarniutigaat. Pinerlussimasunut isertitsivinnut utaqqisut ikilisarniarlugit Inatsisinik atortitsinermut ministerip siunnersuutaata Naalakkersuisunit Inatsisartunut suli saqqummiunneqarsimannginnerannut suna pissutaava?

  • Pinerlussisimasunut isertitsivinnut utaqqisut ikilisarniarlugit Naalakkersuisut nammineq qanoq iliuuseqarniarpat?
Powered by Labrador CMS