Saammaassiinnarneq isumaqatiginngilaat
Pineqaatissinneqartussat sivisuallaamik utaqqisinneqarnerat pissutigalugu saammaassiinnarnissamik siunnersuut taamatut isikkoqartillugu naalakkersuisut itigartittariaqarpaat, Steen Lynge isumaqarpoq
-Inuiaqatigiit kalaallit inatsisit isumannaatsumik ingerlanneqarnerannik qularuteqassanngippata, siunnersuut maannakkutut isikkoqartillugu naalakkersuisunit itigartinneqartariaqarpoq.
Taama oqarpoq Atassummi ilaasortaq Steen Lynge, marlunngornermi Sermitsiaq.AG'mi allaaserisaq aallaavigalugu.
Allaaserisami justitsiminister Morten Bødskovip Kalaallit Nunaanni pineqaatissinneqartut inissiisarfiisa amerlineqarnissaata tuaviunneqarnissaa kissaatiginngilaa.
Allatut iliuuseqarluni pineqaatissinneqarnissaminnik utaqqisut aaqqissuussiffigineqarsinnaasut, justitsministeri tikkuaavoq.
Kalaallit Nunaanni pineqaatissinneqarnissaminnut utaqqisut utaqqinerisa sivisussusaat aallaavigalugu saammaassisalernissaq eqqarsaatersuutigineqarpoq, soorlu Danmarkimi taama aaqqiisoqarnikuusoq.
Taamma aaqqissuussinissami qaammatit arfinillit inorlugit pineqaatissinneqarsimasut inissiisarfiiniittussat, namminneq pisuussutiginngisartik pissutigalugu ukioq ataaseq qaammatillu arfinillit utaqqisimappata atuutsinneqarniarpoq.
Danskit akisussaaffitsik qimarratigaat
Taama aaqqiiniarneq pitsaasuunngilaq, Steen Lynge mianersoqqusivoq:
- Taama siunnersuuteqarnermikkut danskit akisussaaffimminnik qimarratiginnipput. Siunnersuut aamma aningaasatigut eqqarsarneruvoq, aningaasat pingaartinneqarnerullutik inuiaqatigiinni kalaallini inatsisit isumannaatsumik ingerlatsinissamit. Naalagaaffiup suliassaqarfik sumiginnarsimavaa pineqaatissinneqarsimasunut inissiisarfinnik piffissaagallartillugu qulakkeerinninnginnikkut.
Steen Lynge naapertorlugu inissiisarfinniittussat immikkorluinnaq pisoqartinnagu saammaanneqartariaqanngillat.
- Paarlattuanik naalakkersuisut ileqqoreqqusassanik siunnersuuteqartariaqarput, pineqaatissinneqarsimasut inissiisarfiiniittussanngorlugit eqqartuussutit inuiaqatigiinni kiffartuussinernut allanngortinneqarsinnaasunngorlugit, piffissap aalajangersimasup iluani suli inissinneqarsimanngikkaanni, naatsorsuutigineqartariaqarporli pineqaatissinneqarsimasut inissiisarfiiannut inissinneqarnissaq erniinnaartumik pisinnaanngitsoq.
- Taama aaqqiinikkut qulakkeerneqassaaq inuiaqatigiit inatsisit isumannaatsumik ingerlanneqarnerannik upperinninnerat, tamatuma saniatigut pineqaatissinneqartup qulakkiissammagu eqqartuussutip inernera piffissap aalajangersimasup iluani naammassineqarsinnaasoq, inissiisarfinni utaqqisoraluarpalluunniit, Steen Lynge oqarpoq.
AG'p arlaleriarluni allaaserisaqarpoq pineqaatissinneqarsimasut inissiisarfii pillugit aammalu pineqaatissinneqarsimasut utaqqisut saammaanneqarnissaat pillugit.