Sooq inuit Danmarkimut nussorpat?
Siumup kissaatigaa, Naalakkersuisut ilaqutariit Kalaallit Nunaanni najugaqartut ilaqutariinnut Danmarkimi najugaqartunut sanilliussillutik aningaasaqarnikkut atugaannik imminnut sanillersuunneqassasut
Akitsinnguaq Olsen, Siumut sinnerlugu Inatsisartunut ilaasortap kissaatigaa Naalakkersuisut ilaqutariit Kalaallit Nunaanni najugaqartut ilaqutariinnut Danmarkimi najugaqartunut sanilliussillutik aningaasaqarnikkut atugaannik imminnut sanillersuussillutik misissuisoqarnissaa.
Taamaattumik paragraf 37 aqqutigalugu apeqqummik saqqummiussivoq:
-Naalakkersuisut ilaqutariit Kalaallit Nunaanni najugaqartut ilaqutariinnut Danmarkimi najugaqartunut sanilliussillutik aningaasaqarnikkut atugaannik imminnut sanillersuussillutik inoqutigiinnut ukununnga misissuilersaarpat:
- Aappariit marlunnik meerallit, inissiami attartukkami najugaqartut, tamakkiisumillu pisortanik ikiorsiissutinik inuussuteqartuusut (annertussusileriikkanik ikiorsiissutit)
- Kisermaaq marlunnik meeraqartoq, inissiami attartukkami najugaqartoq, tamakkiisumillu pisortanik ikiorsiissutinik inuussuteqartoq (annertussusileriikkanik ikiorsiissutit)
- Aappariit, aappaa ilinniarsimanngitsutut SIK-p isumaqatigiissutaa naapertorlugu isertitaqartoq aappaalu pensionisiaqartoq inissiamilu attartukkami najugaqartut
- Aappariit tamarmik pisortanit pensionisiaqartut inissiamilu attartortakkami najugaqartut
Akitsinnguaq Olsenip naalakkersuisunut apeqquteqaatini tunngavilersorpaa: "Ukiuni kingullerni aalaakkaasumik Kalaallit Nunaannit Danmarkimut nuuttarneq ileqquulersimavoq, taakkunanilu amerlasuut nunatsinni inuuniarnikkut aningaasartuutit qaffasippallaarnerat patsisigalugu nuutarput."