Dronningi Nunatsinnut kissalaartumik inuulluaqqusivoq
- Kalaallit Nunaat pitsaasumik ineriartorsimavoq, Ataqqinartorsuaq Dronning Margrethe Sermitsiaq.AG-mit apersorneqarluni erseqqissaavoq
Kalaallit Nunaata ineriartupiloorneranut malinnaasimanini dronning Margrethep nuannaarutigaa.
- Ineriartorneq sualuttorujussuaq pisimavoq. Nalunngilara ajornaatsuinnaasimanngitsoq. Kalaallit Nunaannut nammineerniarneq oqimaaqatigiissitsiniarnerlu ajornaatsuinnaasimanngillat, isumaqarpungalu piffissat ilaanni kikkut tamarmik annilaangasimasut.
- Ineriartorneq pitsaasunik kinguneqarsimavoq, aamma ajornartorsiuterpassuarnik kinguneqarsimagaluarluni, dronning Margrethe Amalienborgimi Christian IX´s palæ-mi Riddersalimi Sermitsiaq.AG-mit apersorneqarluni oqarpoq.
Dronning Margrethe prinsgemalilu marluullutik Nunatsinnut tikeraaqqaarput 1970-imi.
- Ineriartorneq qanittuararsuarmik malinnaaffigisinnaasimavara. Prinsgemali uangalu 1970-imi Kalaallit Nunaat marluulluta tikeraarparput, ukiullu marluk qaangiuttut tappavaneeqqilluta, angalanersuarpullu siulleq pivoq 1975-imi. Kingorna akuttunngitsumik tikeraartarpugut, sivisunerusumik sivikinnerusumilluunniit, dronning Margrethe oqarpoq.
Kalaallit Nunaannut kissalaartumik inuulluaqqusineq
Kalaallit Nunaanni ineriartulipiloorneq inuiaqatigiinnut ersarissunik kinguneqarsimavoq.
- Isumaqarpunga Kalaallit Nunaanni pitsaasorpassuarnik pisoqarsimavoq, aamma nalunngilluaraluarlugu ajornartorsiuterpassuaqartoq. Kinali ajornartorsiuteqanngila?
- Isumaqarpunga ajornartorsiuteqanngitsoq tassaanngitsoq uumassuseqanngitsoq, inuk nunaluunniit. Isumaqarpunga kalaallit inuiaqatigiit ineriartorluartorujussuusimasut, dronning Margrethe tikkuaavoq, taannalu Kunngeqarfimmi Danmarkimi kunngiunermnik 40-unngortorsiorluni arfininngorpat januaarip 14-ianni nalliuttorsiussaaq.
Ataqqinartorsuaq malillugu kunngikkut Kalaallit Nunaanni tamatigut ikinngutinnersumik ersarissumillu naapinneqartarput.
- Oqartariaqarpunga ikinngutinnerneq kissalaarnerlu, siullermik Kalaallit Nunaanniikkatta naapitarput allanngorsimanngivissoq. Prinsgemali uangalu Kalaallit Nunaanni ikinngutinnaarpassuaqarpugut, taamaattumik Kalaallit Nunaannut kissalaarnerpaamik inuulluaqquserusuppugut, Kalaallit Nunaannilu Kalaallit Nunaanniillu soqutiginnittuarneq qutsatigalutigu.