Nunatta kitaani angalaniarneq eqqorneqarpoq

Anorersuarnera erseqqarlunneralu pissutigalugu marlunngornermi Air Greenlandip angallassiniarnera ajornakusoorpoq, minnerunngitsumik Nuummi, Maniitsumi Sisimiunilu

Marlunngornermi ullaakkut annerusumik Nuummi, Maniitsumi Sisimiunilu silarlunnera ajornartorsiortitsivoq. Ass.: Bitten Høegh-Dam

- Maannakkorpiaq Nuuk, Maniitsoq aamma Sisimiut ajornartorsiorfiunerupput. Soorunami isumannaallisaaneq pingaartikkatsigu tamaani angallassinissarput ajornakusooqaaq, taamaammallu kinguartoortoqartassaaq angallassinissallu ataasiakkaat unitsiinnartariaqassallutik. Tamatumunnga anorlerluni erseqqarlunnera pissutaavoq.

Air Greenlandimi tusagassiinermut pisortaq, Pia Christensen Bang, marlunngornermi ullaakkut taamatut Sermitsiaq.AG-mut nalunaarpoq.

- Nittartakkatsinni ”Flyinformation” - "timmisartunut paasissutissat" ataanni aallarfissat tikiffissallu allanngorneri kingulliit ingerlaannaq ilannguttarpagut, tassuunalu angalasussat malinnaagunik pitsaanerpaassaaq.

Ullaaq manna Nuummiit Narsarsuarmukartussat Sisimiunukartussallu iluatsipput.

Powered by Labrador CMS