Eqeersaatitallit noqartoortitsisinnaapput

Nunatsinni niuertarfiit arlaqartut ullumimiit meeqqat atuarnerisa nalaani eqeersaatitalinnik nioqquteqarunnaassapput

Nunatsinni niuertarfiit arlaqartut atuartunut eqeersaatitalinnik ullumikkumiit tuniniaajunnaarput. Assi: Leiff Josefsen

Qangali imeruersaatit eqeersaatitallit Red Bull aamma Cult Cola annertuumik isornartorsiorneqartarput, ingammi meeqqat inuusuttullu eqqissiviitsunngorsinnaammata, aallussisinnaanatik sinilersinnaanatillu.

Taamaattumik ullumimiit niuertarfiit arlaqartut meeqqat atuarnerisa nalaani eqeersaatitalinnik tuniniaajunnaarput.

Nunatsinni Sulisitsisut, CSR Greenland Kommuneqarfillu Sermersooq isumaqatigiissuteqarput meeqqat atuarfiini atuartunut imeruersaatit eqeersaatitallit tuniniarneqarunnaassasut.

- Isumaqatigiissut naapertirlugu niuertarfiit inuiaqatigiinni akisussaaqataanerminni qulakkiissavaat meeqqat atuarnermi nalaani eqeersaatitalinnik imigaqannginnissaat, annertuumimmi imeraanni taamaattut kingunerlutsitsisinnaammata, tusagassiuutitigut nalunaarummi allassimavoq.

Brugsen, Pisiffik, Spar, Natalies Vin & Gastronomi, Nope Discount aamma Ilulissani, Ilulissat Center Marked kiisalu Uummannami Super Rema isumaqatigiissummi peqataapput.

Powered by Labrador CMS