Kiisami sakkuaakkunnaarput
Ulluni 40-ni suliumajunnaareerlutik teleteknikerit suliartoqqeriaannaalerput
Landsdommerip Søren Søndergård Hansenip ataasingornermi unnukkut uppernarsarpaa Attaveqaatit, teleteknikerit kattuffiata namminersorlutillu oqartussat akornanni isumaqatigiissitsiniartuulerluni.
Marlunngornermi illuatungeriit siullermeertumik ataatsimiissapput.
KNR naapertorlugu tamatuma kingunerissavaa kattuffimmi siulittaasup Jonathan N.K. Petersenip ilaasortani suliartoqqussagai, piffissami killilimmi illuatungeriit isumaqatigiissitsiniartoqalernerisigut.
Decembarip 1-anili suliumajunnaarput
Attaveqaat decembarip 1-ani suliumajunnaarpoq, tassaniippullu Tele Greenland, KNR aamma nunatsinni misissueqqaarnerit Asiaq.
Suliumajunnaarnermi illoqarfinni 16-ini telemontørit suliumajunnaarput. Taamaalilluni Tele Greenlandip pisisartui nutaanik oqarasuaatilersinneqarsinnaanngillat internetimulluunniit attavilerneqarlutik, soorlu aamma oqarasuaatit nuunneqaresinnaanatik kukkunerilluunniit aaqqinneqaratik.
Taamatuttaaq aamma aningaasanik tigusisarfiit suliumajunnaarnerup nalaani iluarsaanneqarsinnaanngillat.
- Suliumajunnaarnissap pinngitsoortinnissaa neriuutigisimagaluarparput, isumaqartuarsinnarpugummi ukiuni pingasuni 2,5 procentimi akissarsiat qaffannissaannik neqerooruteqarfigineqarnermut naapertuutinngitsoq, tamannami atuisunut akit qaffanneranniit appasinneroqaaq, Jonathan N. K. Petersen siusinnerusukkut AG-mut oqarpoq.
Nunatsinni naatsorsueqqissaartarfimmiit atuisunut akit januaari 2008-miit januaari 2011-mut 6,8 procentimik qaffassimapput.
Attaveqaat 50-it missaanni ilaasortaqarpoq suliumajunnaartunik. Amerlanerpaat Tele Greenlandimi sulisuupput.