Danmarkip Issittoq samminiarpaa
Ukiortaamiit Danmark nunani avannarlerni illersornikkut suleqatigiiffimmi Nordefcomi siulittaasuulerpoq Issittorlu pillugu suleqatigiinneq samminiarlugu
Danmarkimi naalakkersuisut saamerliuniat ukiortaamiit EU-mi siulittaasuuliinnanngillat.
Aamma ukioq manna Danmark nunani avannarlerni illersornikkut suleqatigiiffimmi Nordefcomi siulittaasuulerpoq.
Suliassat annertupput. Aningaasaliissutit ikilisimapput, anguniakkalli annertullutik. Afrikap kangiani suliniuteqarnerup saniatigut nunani avannarlerni suleqatigiinnermi siulittaasuunermi Issittoq sammineqarnerussaaq.
Illersornissamut ministerip Nick Hækkerupip neriuutigaa nunani avannarlerni illersornissamut ministerinik suleqateqarneq pitsaanerulerlunilu nukittunerulissasoq.
- Qangalili kissaatigisimavarput nunani avannarlerni qanittumik suleqatitsinnik suleqatigiinnerup nukittorsarnissaa. Ilaatigut pissusissamisoorpoq isiginiassallugu qanoq ililluta ataatsimoorluta pitsaanerusumik isumatunerusumillu suleqatigiissinnaanersugut, aningaasatigut atugassaritaasut ikilineranni nutaaliornikkut.
- Nunai avannarlerni ministereqatikka peqatigalugit nunarsuarmioqatigiinnik suleqateqarnerunissap oqaloqatigiissutiginissaa qilanaaraara, Nordefcomi siulittaasuunitsinni, Nick Hækkerup oqarpoq.
Issittumi ineriartorneq
Issittumi suleqatigiinnermut atatillugu Issittumi siunnersuisooqatigiit oqaliffittut qitiupput, illersornissamut ministereqarfik nalunaarpoq. Umiarsuit anallannerulernerisigut upalungaarsimanerunissaq pisariaqarpoq ajonaalersoqartillugu, annaassiniarnermi avatangiisillu mingutsinneqarnerani.
Suliniutissanilli aalajangersimasunik toqqartuinissaq suli siusippallaaqaaq, illersornissamut ministereqarfik Sermitsiaq.AG-mut nalunaarpoq.
- Siulittaasuunerput aallartilaaginnartoq sunik suliniuteqarnissamik taakkartuissalluni siusippallaaqaaq. Kisianni nalinginnaasumik Issittumi ineriartornissaq oqaluuserineqassaaq. Illersornissamut ministereqarfimmi soorunami namminersorlutik oqartussat saaffigissavagut, illersornissamut ministereqarfimmit nalunaarutigineqarpoq.
Siulittaasuutitaqarnerup ingerlanerani illersornissamut ministerit marloriarlutik naapissapput. Siulleq pissaaq Afrikap kangiani maajip 7-aniit 12-anut 2012, aappaalu ingerlanneqassalluni novembarip 14-ani 15-anilu.