Visit Greenlandimik taaguuteqalerpoq

Inuutissarsiornikkut siuarsaaneq nutarterneranut ilaatillugu naalakkersuisut aalajangerpaat nunatsinni takornariaqarnermut inuutissarsiornermullu siunnersuisooqatigiit allamik taaguuteqalissasut ima Visit Greenland A/S.

Suliffeqarfimmi siunertaq aamma allanngortinneqassaaq takornariaqarneq ilisarnaateqarnerlu samminerussallugit.

Taamalilluni inuutissarsiornermik siunnersuineq suliffeqarfiup ilagisimasaa ISCO A/S-imut nuunneqassaaq.

Visit Greenland A/S nutaanngornermini taamaallaat nunatsinni takorneriaqarnermik ilisarnaateqarnermillu suliaqassaaq.

- Taamaalilluni siulersuisut allanik piginnaaneqartussaapput. Naalakkersuisullu aalajangerpaat periarfissaq una iluatsillugu ukiorpassuarni siulersuisuusimasut taarserniarlugit, tusagassiuutitigut nalunaarutigineqarpoq.

Siulersuisut nutaat tassaalissapput Karin Egede siulittaasutut, siulersuisuni ilaasortat allat tassaassallutik Anette Lings, Ole Andersen aamma Salik Hard.

Visit Greenland takornariaqarnikkut ilisimasaqarfiulissaaq nunarpullu takornariarfissatut nittarsaattussaassallugu.