Ukiut tallimat sinnerlugit aatsaat taama pitsaatigisumik

Ukiumi naatsorsuusiorfiusumi 2010/2011-mi Rpyal Greenland akileraareerluni 79 million koruuninik sinneqartoorpoq

ÅUkiuni tallimanit sinneqartumi ukiumut angusaq imi aatsaat taama pitsaatigaaq. Assi: Royal Greenland Royal Greenland

Nunatsinni suliffeqarfiit annersaannut Royal Greenlandimut uummateqartunut tamanut nutaarsiassat pitsassuupput.

Ukiumi naatsorsuusiorfiusumi 2010/2011 septembarip 30-ni 2011-mi naammassisumi Royal Greenland akileraareerluni 79 million koruuninik sinneqartoorpoq, tassalu ukiup siulianut 43 million koruuninik amigartoorfiusumut naleqqiullugu 122 million koruuninik pitsanngoriarfiulluni.

- Naatsorsuutitigut angusarissaariartorneq iluarisimaarnartorujussuuvoq, aammattaaq eqqarsaatigalugu ukiut marluinnaat matuma siornatigut Royal Greenland akileraarutit ilanngaatigereerlugit 200 mio. koruuningajannik amigartooruteqarmat, Royal Greenlandimi siulersuisut siulittaasuat Niels d Conick-Smith aamma pisortaaneq Mikael Thinghuus nalunaarput.

Royal Greenlandip kaaviiaartitai 11 procentimik amerleriarput 4.724 million koruuninut. Siuariarneq ukiuni arlalinni kaaviiaartitsinerup uninngaannarsimanerup appariartortullu malitsigaa.

- Siuariarneq peqquteqarpoq Royal Greenlandimi tuniniaavinni siuariarneq, Mikael Thinghuus aamma Niels de Coninck-Smith erseqqissaapput.

Kangia Skandinavialu iluatsitsiffiupput
Taakku naapertorlugit 2010/2011-mi siuariarfiunerpaapput ingammik Kangia Skandinavialu.

Ingerlatsinermi anngusat (EBIT) 171 million koruuniupput, tassalu ukiup siulianut naleqqiullugu 3,6 procentimik siuarniarnerulluni.

- Isertitaqarneruneq peqquteqarpoq Royal Greenlandip Atlantikup avaqnnaani suliaannut, ingammik raajanut qalerualinnut, nipisat suaanut raajanullu uutanut.

- Royal Greenlandimi Atlantikup avannaani ingerlatsinikkut isertitaqarneruneq peqquteqarpoq ilaatigut sulilluarnerunermik aammali ingammik Royal Greenlandip tuniniaaviisa anginerulerneranik, taamaalilluni tuniassiassat sukkanerusumik pitsaanerusumillu tunineqarsinnaallutik akillu pitsaanerpaat anguneqarlutik.

- Niuernermi pitsaanerusunik akigititat Royal Greenlandip tulaassinernut akiliutigisartagaanut sunniuteqarput taakku agguaqatigiissitsilluni 19 %-imik ukiup siulianit qaffasinnerummata, Mikael Thinghuus aamma Niels de Coninck-Smith nalunaarput.

Powered by Labrador CMS