Titartakkat Danmarkimi soqutigineqaqaat
Meeqqap titartagai atorlugit namminersorlutik oqartussani tillinniarsimasut tigusarineqarneri, Danmarkimi aviisit qulequtsiuppaat
Niviarsiaqqap aqqanilinnik ukiullip sunnguit tamaasa ilanngussimavia oktobarip 23-ani unnukkut nal. 21 miss. namminersorlutik oqartussat silataanni angutit marluk eqqumiitsumik pissusilersortut isiginnaareerlugit titartaagami.
Niviarsiaqqat allat marluk ilagalugit bussit unittarfianniitillutik allaffeqarfiup avannaata tungaani matup eqqaani angutit marluk uninngasimapput. Isiginnaakkani tamaasa iiorarsimavai aqaguanilu tusaramiuk namminersorlutik oqartussat illorsuaanni tillinniartoqarsimasoq, isiginnaarsimasani pisullu imminnut ataqatigiissippai.
Taamaattumik takusani tamaasa titartarsimavai angunnilu ilagalugu politiiliarlutik. Misissuinermik aqutsisup titartakkat takugamigit nuannaajallaqaaq.
- Tillinniarfigineqartumik qimmera ilagalugu misissuinitsinni, niviarsiaqqap angutinik marlunnik takunniffigisimasaani qimmera qisuariartarpoq. Qaqutigoorpoq takunnissimasumik taama pitsaatigisumik naammattuuisarnerput, Johan Westen Nuummi politiinit oqarpoq.
Titartakkani sunnguit eqqaamassutaasinnaasut ilanngunneqarsimapput, angutit isikkui aammali atisat suut atorneqarsimanersut.
Niviarsiaraq politiinit kakkagineqartoq pillugu allaaserisaq maanna Danmarkimut aamma annguppoq. Arfininngornermi nuna tamakkerlugu aallakaatitsivinnit sammineqarluni. Ilaatigut Ekstra Bladet, bt.dk, dr.dk aamma Berlingskes hjemmeside.
Angutit marluk politiinit ilisarisimaneqarluarput, politiit angutip aappaanut iseramik - titartakkamisulli - skuui Adidasiupput qaqortut qernertunik titarnillit. Angerlarsimaffimmi misissuinermi politiit tillitanik nassaarput, angutillu tillinniaqatimi aqqa taammagu, tillinniarneq paasineqalertorpoq.
Ataasinngorneq angutit marluk 20-nik 24-nillu ukiullit eqqartuunneqaramik, aappaa qaammatini arfinilinni aappaalu qaammatini arfineq-pingasuni pineqaatissinneqarsimasut isertitsivianiittussanngorlugit unnerluunneqarput. Angutit eqqartuussut Nunatta eqqartuussivianut ingerlateqqippat.
Unnerluussisut ilisimatitsipput tillitat tamarmik utertinneqarsimanngitsut aamma namminersorlutik oqartussani tillinniarneq unnerluussutip inerneranut ilapittuutaasimanngitsoq.