Akunnittarfiutillit nersornaatisisut
Namminersorlutik Oqartussat 2011-mi Avatangiisinik Pinngortitamillu Mianerinninneq pillugu akissarsititsinissaasa aappaat pingasunngornermi januarip 4-ni 2012 Tasiusami Vandrehjem-imut, Jørgine aamma Otto Frederiksen-imit pigineqartumut tunniunneqarpoq
Soorlu qungujulaarneq tulluussimaarnerlu malunnassasut Jørgine aamma Otto Frederiksen, Narsap eqqaani Tasiusami vandrehjemiutillit pingasunngornermi ualikkut Namminersorlutik oqartussat Avatangiiseq Pinngortitarlu pillugit 2011 nersornaatip aappaanik tunineqarunik.
Nersornaasiinissaq Narsaq Youth Hostel'imi ingerlanneqassaaq.
Akissarsiaq 20.000 kr.-inik naleqartoq qulequtaqarpoq ”Nukimmik atorluaanissamik suliniutit aamma avatangiisinik pitsanngorsaataasumik nukimmik ataavartumik atuineq”.
Nunatsinni atorluaalluni akunnittarfiit siullersaannik peqarusupput
Vandrehjemmi nukiup ataavartup iluani assigiinngitsunik suliniuteqarpoq. Ilaatigut perusuersartarfik saanngutinngortitsisartoq, inunnut qulinut imiisivik seqernup qinngorneranik kiassarneqartoq kiisalu seqernup qinngorneranit innaallagiaqarneq. Vandrehjemmi puilasumit imermik ruujorikkut aqqutilerneqarsimasumit pilersorneqarpoq.
Pilersaarutit ilagaat seqernup qinngorneranik kiassarneqartumik imermik uffaatissamik atuinerulernissaq, vandrehjemmip seqernup qinngorneranik kiassarneqarnissaa, imermut ruujorimut pumpi aamma seqernup qinngorneranik ingerlanneqartumik nillataartitsiveqarnissaq. Suliniutit tamakku tunngavigalugit vandrehjemmip anguniarpaa økovandrehjem-inngornissani, mingutsitsinngitsumik ingerlatsinermigut.
- Vandrehjemmi taama suliniuteqarnermigut ikummatissanik sipaartarpoq taamaalillunilu Kalaallit Nunaanni CO2-mik aniatitsinermik annikillisaaqataalluni.
Nunamut Namminermut, Pinngortitamut Avatangiisinullu Naalakkersuisup Anthon Frederiksenip Tasiusami vandrehjemimut akissarsititsineq taama tunngavilersorpaa.
Ukioq manna Avatangiisinik Pinngortitamillu Mianerinninneq pillugu akissarsiaq immikkoortunut marlunnut agguarneqarpoq: Ilisimatitsinikkut avatangiisinik paasisimasaqarnerulersitsineq”, ”Nukimmik atorluaanissamik suliniutit aamma avatangiisinik pitsanngorsaataasumik nukimmik ataavartumik atuineq”
Katillugit tallimat akissarsitinneqassapput. Akissarsititsineq siulleq pivoq 30.december 2011 Niels-Henrik Lyngemullu Nuummeersumut tunniunneqarluni immikkoortumi ”Ilisimatitsinikkut avatangiisinik paasisimasaqarnerulersitsineq”-mi.