Aqqaluaq Narsami oqallitsitsinissamut piareerpoq
Aqqaluaq B. Egede, Inuit Ataqatigiit siulittaasuata tullia, marlunngornermi politikkimik oqallitsitsissaaq
- Politikkimi ullumi sumut killippugut? Sumut ingerlaarpugut?
Apeqqutit taakku marluk akissutissarfigisinnaavatit - imaluunniit tipisiorfigisinnaavatit - marlunngornermi unnukkut nal. 19 Narsap katersortarfianut ornigunnikkut, taama Inuit Ataqatigiit siulittaasuata tullia aamma Inatsisartunut IA sinnerlugu ilaasortaq Aqqaluaq B. Egede neriorsuivoq.
- Kuannersuit pillugit oqallinnermi inuppassuit isumaqarput aqaguaguinnannguaq aatsitassarsiortoqalissasoq, naak inatsisiliornermit tamanna periarfissaanngikkaluartoq, Aqqaluaq B. Egede tikkuaavoq. Taassuma ilanngullugu oqaatigaa Kujataani angallannermik attaveqarnermillu oqallinneq ingerlalluartoq, naak suli ilisimanngisat pissutigalugit aalajangiisoqavinngikkaluartoq.