Sarfannguani meeqqat juullimi tunissutisipput

Decembari aallartisimalersoq meeqqat Sarfannguarmiut juullimut tunissutisinngitsoornissaat aarleqqutigineqarpoq. Qujanartumik tamanna pinngitsoortinneqarpoq

Sarfannguanut karsersuit marluk nassiunneqarput. Meeqqat poortugarsiassaat decembarip 21-anni nunaqarfimmi ullukinnerup nalliussineqarneranut atatillugu tunniussuunneqartut. Assi: Paninnguaq Fleischer-Lyberth

Pisiffimmi atorfillip nakkittartuusup Sarfannguani ajornartorsiortoqartoq Sivdlermi (Sisimiut aviisiat, aaq.) atuarsimavaa, qanorlu iliuuseqarnissani aalajangiullugu.

- Allaaserisaq atuarakku eqqarsarpunga ilumoorsinnaanngitsoq meeqqat juullimi tunissutisiassaqanngeratarsinnaanerat. Taamaattumik immikkoortortaqarfipput Pisattat sianerfigaara apeqqutigalugu uanga nammineq allagartarsualioruma katersinissamut peqataajumassanersut. Qujanartumik isumassarsiaq iluaraat, Anders Laursen suliniuteqaqqaartoq oqaluttuarpoq.

Allagartarsuakkut Sisimiuni innuttaasut kaammattorneqarput tunissutissamik arlaannik piseqqullugit kingornalu karsimut katersinermut atugassiamut ikeqqullugit.

Meeqqat juullimi tunissutissarsinngitsooratarsinnaanerannut pissutaavoq Sarfannguani aalisartut tunitsiveqannginnerat. Taamaattumillu aalisartut qaammatini arlalinni isertitaqarsimanngillat.

- Arlaannik susoqanngippat meeqqat ukioq manna juullimut tunisutisinavianngillat. Tamanna erloqinarpoq, aalisartut ilaat taamani oqarpoq.

Karsit marluk juullimut tunissutissanik ulikkaartut
Karsersuit marluk tunissutissanik ulikkaartut Sarfannguanut nassiunneqarput. Ullukinneq nunaqarfimmi decembarip 21-anni nalliussineqarmat poortukkat meeqqanut tunniussuunneqarput.

- Nuannersorujussuuvoq taamaaliorsinnaaneq inuit allat suliniuteqarnerannit anguneqarsinnaammat. Meeqqat nuannaartorujussuupput, Sarfannguani atuarfiup pisortaa Jens Jørgen Jensen oqaluttuarpoq, taanna Sisimiuni innuttaasut aamma Pisiffiup tunissutaannik agguaassinissamik akisussaasuutinneqarpoq.

Sarfannguani meeqqat kisinneqarput, atuartut poortugassitinneqareermata sinneri Sarfannguani meeqqanut allanut agguaanneqarput.

- Taamaaliornerup kinguneranik meeqqat Sarfannguani juullimut suli qilanaarnerulertut, Jens Jørgen Jensen oqarpoq.

Sisimiuni innuttaasut tuniserusunnerisa saniatigut Anders Laursen Pisiffimmut pisiassat misiligutissatut nassiunneqartartut ilaannit karsinut ilanngussivoq.

Powered by Labrador CMS