Meeqqanut inuusuttunullu isumaqatigiissut nuuppoq
Ukiortaamit kommunit akisussaaffigilissavaat perorsaaneq tarnillu pissusiisigut siunnersuisarneq aamma annertusisamik immikkut atuartitsineq
Ilinniartitaanermut ilisimatusarnermullu Naalakkersuisup Palle Christiansenip ullumi atsiorpaa, 2012-imi januaarip aallaqqaataanit kommunit annertusisamik immikkut atuartitsisarneq akisussaaffigilissagaat. KANUKOKA-p siulittaasuata Martha Abelsen peqataavoq, atsioqataanermigullu perorsaanermik tarnillu pissusiisigut siunnersuisarnermik (PPR) akisussaasunngorpoq.
Martha Abelsen tusagassiivinnut allakkakkut nalunaarpoq, kommunini qullersaasut suliassaqarfimmik tigusinissartik qilanaarutigigaat, taamaalilluni kommunini assigiiaamik ataatsimoortumillu suliniuteqartoqarsinnaanngussammat meeqqanut inuusuttuaqqanullu tunngatillugu.
- Ilinniartitaanikkut, meeqqanik inuusuttuaqqanillu isumaginninnermi periusissiornikkut kiisalu meeqqanut ilaqutaannullu siusissukkut iliuuseqartarnikkut nukittorsaanissaq Naalakkersuisut sulissutigisimavaat. Suliassaqarfimmillu pineqartumik tunniussinikkut suliniutit imminnut pitsaanerusumik sunniuteqaqatigiissinnaanngussapput, Palle Christiansen oqarpoq.
Perorsaanikkut tarnillu pissusiisigut siunnersuisarneq aamma annertusisamik immikkut atuartitsisarneq meeqqat atuarfiannut aammalu meeqqanik inuusuttuaqqanillu sullissinermut atatillugit suliassaqarfiupput pingaaruteqartut.
Taamaalilluni PPR-ip atuuffia meeqqanut inuusuttunullu atuartitaasussaanerup avataaniittunut, tassa 18-it tikillugit ukiulinnut tamanut, tunngatinneqartussanngorlugu annertusineqarpoq.