Nunatsinni Tusaamasat allattorsimaffiat
Tusaamasat allattorsimaffiannut inuit arlallit ilanngunneqarnissaat piukkunneqarpoq. Inuit ataqqisavut siunissamilu eqqaamarusutagut
Elite Sport Greenland, Air Greenland, Grønlandsbanken, TELE-POST aamma NunaFonden suleqatigiillutik inuit nunatsinni tusaamasat allattorsimaffeqalernissaat angunialerpaat.
Elite Sport Greenland aningaasaliisuisalu Hall Of Fame aqqutigalugu timersortartorpassuit maannamut inuusut toqoreersullu, nunat tamalaat pissartanngorniunnerini unammiuaarnerinilu Nunatta sinniisaatut peqataasarsimasut nersorniarlugit allattugaatigilerniarpai.
Finn Meinel, siulittaasoq, Elite Sport Greenland.
Elite Sport Greenlandilp aningaasaliisartui siulersuisuni inissisimanissaat naatsorsuussaavoq. Taamatuttaarlu KNR aamma Sermitsiaq.ag siulersuisuni issiatitaqassallutik. Naatsorsuutigineqarpoq ukiumi nutaamiit maleruagassanik aaqqissuussinissaq piareersarlugu, ilaasortaasinnaasunik ikkussinissamik aaqqissuussisoqassasoq.
Hall of Famemut ilaasortanngortitsiniarnissaq unammillernartuusussaassaaq, ukiorpassuarni timersortartuusimasorpassuit assigiinngitsut takutitsilluartarsimaneri pissutigalugit, ilaatigullu ilaasortaasinnaasutut taaneqarsinnaasut ukua piukkunneqarsinnaapput: Apollo Lynge Nunarput sinnerlugu siullersaalli OL-mi peqataaqqaartoq, sisorartartut Arne Hardenberg, Michael Binzer, Morten Jørgen Heilmann, Taekwon-domi unamisartoq Christian Isaksen, Assammik arsartartuusimasoq Jakob Larsen allallu.