Attaveqaat sukasarpoq
Attaveqaatip isumaqatigiinniarnertut taasinnaanngilai. Teleteknikerit sillimaniarnermut isumaqatigiissut isumaqatigiinniarnerminnut ilannguppaa Naalakkersuisumut ajugaaniarnerminni
Atuisut 400 sinnerlugit teleteknikerit suliumajunnaarnerinit eqqugaareerput, mannamut suliumajunnaarnerup qaammatip sinnerlugu ingerlareernerani. Naalakkersuisut teleteknikerillu isumaqatigiinniarneranni nikeriartoqanngippat atuisut suli amerlanerit sallunaveeqqutitut tigummisaalernissaat ilimagineqarsinnaavoq. Maannakkut teleteknikerit peqatigiiffiata Attaveqaatip sillimaniarneq pillugu isumaqatigiissutertik nerriviup qaanut ilivaat, Naalakkersuisumik isumaqatigiinniarnerit nikerianngippata atorunnaarsinniarlugu.
Sillimaniarnermut isumaqatigiissut imaannaanngitsuuvoq atorunnaarsinneqassappallu annernassalluni. Sillimaniarnermik isumaqatigiissut atorunnaarsinneqassappat sulisut maannakkut sillimanissaq pillugu sulisinneqartut angerlartinneqarsinnaapput, sulisitsisullu pisussaaffigilissavaat sulisut ataasiakkat immikkut isumaqatigiissuteqarfigalugit sinerissamut suliartortinneqarnerannik.
Ullumi Naalakkersuisunut ammasumik allakkani ima allagaqarput:
Attaveqaat Naalakkersuisumut ammasumik allagaqaraluarami suli akineqanngilaq. Atorfilittat
akissuteqarput tusartagariikkatsinnik. Apeqqutillu ujartukkagut akineqaratik isumaqatigiinniarnermik
taasanut innersuunneqarpugut. Isumaqatigiinniarnernik taaneqartut Attaveqaatip isumaqatigiinniarnertut
taasinnaanngilaat pissutigalugu siumut aalajangeriikkanik angusaqarnissamik naalakkiinerummata.
Apeqqutit soqutiginartut ujartukkagut Naalakkersuisumut akeqqullaraluaratsigit soorlu;
Ilumut suli Naalakkersuisunit sumi inunngorsimaneq aallaavigalugu akissaasersuineq
atuutiinnarniarneqarnersoq tapersersorneqarnersorlu?
Nunatsinniit aningaasanik annissuineq killilerneqarsimaarusunnginnersoq, aningaasat nunatsinni
sulisussanngorlugit?
Qulaani apeqqutit akineqanngitsut Naalakkersuisut nipangiullugit akuersaaginnarnerpaat?
Isiginnaartuuginnassanerpugut Naalakkersuisut innuttaminnik immikkoortitsillutik annikinnerusumik
atugaqartitsiniarnerannik?
Naalakkersuisunut eqqaamaqqunaraluarpoq isumaqatigiinniarnerni tunniunneqarumaartut
uteqqittussaammata Attaveqaatip ilaasortai nunatsinni nunaqavissuummata akileraartartuullutillu, taamalu
nunatsinni aningaasnik kaaviaartitsisut ilagalugit.
Attaveqaatip isumaqatigiissutini sillimanissanut tunngatillugu atorunnaarsikkumallugu eqqarsaatersuutigaa
isumaqatigiinniarnerni piumasaqaatitsinnik qanillattorniarneqanngikkutta. Ilaasortagut ilaat sillimasussatut
issiasut angerlartinnissaat eqqarsaataavoq taamaasiguttalu sulisitsisoq immikkut isumaqatigiissuteqarlutik
atorfeqartinneqartut sineriammut aallartittariaqassavaat.
Aamma eqqarsaataasinnaavoq ilaasortagut sillimasussatut issiatitagut peqquneqartut telefon normut
aalajangersimasut kisiisa Politiinuuppata, qatserisartunuuppata, nakorsaqarfinnulluunniit normut
aalajangersimaqqissaartut kisiisa sillimaffigineqassasut. Attaveqaatit allat tamarmik ajortissappata
iluarsineqartussaanagit suliumajunnaarneq ingerlatillugu.
Attaveqaammi ilaasortat sinnerlugit
Jonathan N. K. Petersen
Siulittaasoq