Qallunaat kunngimut ilumoornersaapput

Isumasiuineq Megafon-ip Politiken sinnerlugu ingerlassimasaa upperissagaanni qallunaat Europami kunngimut ilumoornersaapput. Isumasiuineq malillugu qallunaat 77 procentii isumaqarput Danmarki kunngeqarfiussasoq, 16 procentit naalagaaffik kunngiitsuuffik piumanerullugu. Ukiup ataaserpiaap matuma siornatigut Politiken taamatut isumasiuivoq, taamanikkullu 25 procentit kunngiitsuuffimmik tapersersuipput.

Europami kunngikkormiunik allanik tapersersuineq 58 aamma 77 procentit akornanni nikerarpoq, oqaluttuarisaanermik ilisimatooq, ph.d. Københavns Universitetimilu lektori Lars Hovbakke Sørensen oqaluttuarpoq.

- Kunngeqarnerup tapersersorneqarnera annertoorujussuuvoq. Europami nunanut allanut sanilliullugu Danmark kunngeqarnermik tapersersuinersaavoq, Lars Hovbakke Sørensen Politikenimut oqarpoq.

Aamma Jes Fabricius Møller, Københavns Universitetimi Saxo-institutimi oqaluttuarisaanermi lektori, naliliivoq 77 procentimik tapersersuineq qaffasissuusoq.
- Tamanna sulinermi tunngavissatut qularnanngilluinnartutut isigaara. Dronningi unnuakkut eqqissilluni sinittarsinnaavoq, taanna oqarpoq.

Nuannarinninnerup assigiinngissuteqarneranut ilaatigut nassuiaatissaavoq qallunaat kunngikkormiut nutartersinnaasimammata, sukkavallaamik ingerlannagu.
- Nunani allani tamanna sukkavallaamik kigaappallaamilluunniit ingerlasimavoq. Norgemi tapersersuineq annikilleriarpoq kunngissaq anaanamut kisermaamut katimmat, Lars Hovbakke Sørensen Politikenimut oqarpoq.

- Tamanna mutiuvallaalaarsimavoq nalinginnaalaarpallaarsimallunilu alutornassutsip ilaanik peersitsisoq.
Mutiuvallaarnanilu qanganisaavallaannginnerata saniatigut immikkut ilisimasallit isumaqatigiipput qallunaat kunngimik tapersersuinerat attuumassuteqarpoq minnerunngitsumik dronning Margrethep naalagaaffimmi qullersatut inissisimanerminik ingerlatsineranik.

- Dronningi aalajangersimalluinnartuuvoq. Atorfimmini ilisarnaatigaa sumilluunniit kukkuneq ajorami, Jes Fabricius Møller oqarpoq.