Aalborgimi juullimi naalagiarneq

Aqagu juulliaqqami, nal. 10 domprovst emeritus Ricard Petersen Aalborgimi Grønlands Torvimi Hans Egedes Kirkemi naggataamik naalagiartitsissaaq.

Rikka, ukioq manna 80-iliisoq, nalunaarpoq aqagu naalagiartitsinissani naggataajusoq, ukiorpassuarnilu ileqqorineqartartutut juullimi naalagiarnermi tussiaqattaartoqassaaq, Aalborgimi kalaallit peqatigiiffianneersunik Ikinngutigiit.

Naalagiarnerup kingorna Ikinngutigiit Kalaallit Illuutaanni kaffillissapput/tiillissapput meeqqanullu sodavandillissallutik, kikkut tamaasa juullisiorluarnissaannik kissaallugit, kingornalu angerlakaassapput juulliaqqamut piareersariartorlutik.