Sisorarfiit aningaaserivimmit ikiorserneqartut
Grønlandsbanken Nuummi Sisorarfiit aningaasanik tapersersorpai
Grønlandsbankenip Nuummi Sisorarfinnik pingaarnertut aningaasanik tapersersuisuunini ukiuni marlunni ingerlaqqittussatut isumaqatigiissuteqarfigaa. Taama administrationsdirektør Carsten Th. Pedersen tusagassiivinnut nalunaaruteqarpoq.
- Naak Kalaallit Nunaat tamakkerlugu aningaaserivittut atuukkaluarluta uagutsinnut pingaaruteqarpoq sammisassat inunnut amerlasuunut nuannaarutaasut tapersersornissaat. Ukiuunerani sisorarneq inuit amerlasuut ataatsimoorfigisarpaat, taamaattumik uagut Grønlandsbankimi nuannaarutigaarput Nuummi Sisorarfinnik tapersiinissarput, pisortaq oqarpoq.
- Sisorarfiit inuussutissarsiortut aningaasaateqarfiattut ingerlasoq ukiut tamaasa Kommuneqarfik Sermersuumit ingerlatsinermut atugassanik aningaasanik taperneqartarpoq, allanillu aningaasaleeqataaffigineqarnani imminut napatissinnaanngitsoq, Sisorarfinni pisortaq Knud Chemnitz tusagassiivinnut nalunaarpoq.
Grønlandsbanken ilaatigut Elite Sport Greenland, Arctic Circle Race aamma Qimussimik sukkaniunnerit aningaasaleeqataaffigai.