Akiligassakka akilereerpakka
Inatsisartunut ilaasortaq Knud Fleischer ataasinngormat Ilulissat Eqqartuussiviannit akiitsoqarfigisaminut Sisak Diesel, Ilulissat akiligassamik akiisussanngortitaavoq. Knud Fleischerilli oqaatigaa akiitsuni akilereerlugit
Kattusseqatigiit Partiiat sinnerlugu Inatsisartunut ilaasortaq Knud Fleischer, ataasinngorneq decembarip 19'iat Ilulissani Eqqartuussivimmit eqqartuunneqarpoq Sisak Diesel Ilulissaniittumut akiligassaminik akileeqqullugu.
Akiligassat tallimat pineqarput, katillugit 7.024,61 koruuniusut. Knud Fleischer akiitsut pillugit akileeqqusissutit qisuariarfigisimanngilai aammalu Eqqartuussivimmut takkunnani. Taamaattumik unnerluussisut oqaasii, tassa Sisak Dieselip - eqqartuussinermi tunngaviliisuupput. Tamatuma saniatigut Knud Fleischer eqqartuussinermut akiitsuut 500 koruuniusoq aamma akilissagaa, eqqartuussinerup inernerani ilanngunneqarsimasoq eqqartuussisumillu Nicolaj Geislerimit atsiorneqartumi takuneqarsinnaavoq.
Knud Fleischerili ullumi Sermitsiaq.AG'mut oqarpoq akiitsut akilerneqareersut.
- Ilulissani Eqqartuussivik ilisimatippara Nuummiillunga. Tamatuma saniatigut eqqartuussivimmit decembarip 19'ianni eqqartuunneqarnissannut aggeqqusissummik takunikuunngilanga. Siusinnerusukkut eqqartuussisoq Nicolaj Geisler aamma oqaluunnikuuvara, taassuma oqaatiginikuuaa suliaq naammassineqarnikuusoq, Knud Fleischer oqarpoq.
- Akiligassat akilereernikuuakka. Taamaattumik Sisak Diesel akiitsoqarfiginngilara, Knud Fleischer naqissusiivoq.
- Partiimut allamut sinniisuunera pissutigalugu uannik malersuinertut nalilerpara, Knud Fleischer oqarpoq.
Ark'aluak' Geisler, Ilulissani Sisak Dieselimik piginnittup eqqumiigaa, tamanna Knud Fleischerimit eqqartuussivimmut nalunaarutigineqarsimanngimmat.
- Arlaleriarlunga akiliisimaneranut uppernarsaatit qinnutigisaraluarpakka tigussanagilli, Ark'aluak' Geisler oqarpoq.