Ilanngaaserisup poortukkat ammaatiterpai
Ukulluinnerunerpoq alapernaannerunerporluunniit, Kangerlussuarmi ilaanngaaserisup aalajangersimasup angalasut poortukkat nassataat tamaasa ammaatitertarmagit
Qimmit qinnguartaatilluunniit angalasut nassataannik pasinarsinnaasunik nassaarfiginngippatigit, taava sooq Kangerlussuarmi ilanngaaserisup aalajangersimasup ataatsip poortukkat tamaasa ammaatitissavai?
Taama apeqquteqarpoq Erno Petersen, Akileraartarnermut pisortaqarfimmut allakkamini ilanngaaserisoq ataaseq aqqa taanngikkaluarlugu marserpallaarnera pillugu naammagittaalliuummini.
Naammagittaalliuumminili allappoq:
... Matumuuna Pisortaqarfik apeqquteqarfigerusuppara, ilanngaaserisutut suliami suleqataasoq qanoq pisinnaatitaaffeqartiginersoq? Taama apeqquteqarninnut tunngavigaara Kangerlussuarmi ilanngaaserisutut suliallip aalajangersimasup ataatsip, angalasut poortukkat nassataat tamaasa ammartarmagit marsernini pissutigiinnarlugu. Poortukkat aammalu tunissutissat qinnguartaanerinit assit sumilluunniit pasinarsinnaasunik ersersitsinngillat. Politiit qimmiisa ikiaroornartulerisartut poortukkat soqutiginngikkaluarpagilluunniit, taamaakkaluartoq sulisup aalajangersimasup ataatsip poortukkat tamaasa ammartarmagit, poortukkat Danmarkimi pisiniarfinni sulisunit poortorneqarnikut! Inuinnartut taama pissuseqartoqarnera mamaageqaara. Aatsaat perngaamik sulisoq ataaseq taamaaliulinngilaq.
Tusarfikka tutsuiginartuupput Kalaallit Nunaanni Politiini atorfillit. Tusarfikka kikkuunersut taanianngilakka.
Taamaattumik isumaqarpunga Akileraartarnermut pisortaqarfik ajornartorsiuteqartoq, tamannalu Kangerlussuarmi sulisuminut tikkuartariaqaraa. Malittarisassaqartariaqarpoq qaqugukkut sulisut poortukkanik tunissutinillu ammaasinnaassanersut. Marsernerli pissutiinnarlugu ammarteriuartoqassappat tamanna sulisumut kinguneqartariaqarpoq.
Soorunami ilanngaaserisutut suliassat suliarineqartussaapput aamma poortukkat pasinarsinnaasut misissorneqassallutik. Qinnguartaanerit tamatigut pissusissamisoortoqartinnagu arlaannik ersersitsisarput, pasinartoqarpallu poortukkat tunissutissallu misissorneqassapput politiit imaluunniit ilanngaaserisut qimmii atorlugit kingornalu ammarneqassapput, qimmit poortukkat qisuariarfigippassuk.
Uggornaqaaq sulisup aalajangersimasup suliamik ingerlatsinermini qinnguartaanerit qimmillu ikiaroornartunik narajorsinnaasut tatiginngimmagit. Ilaqutariit meeqqallu arlallit Kangerlussuarmi taamaattumik sulisoqarnera pakatsissutigisarpaat.
Neriullunga Akileraartarnermut pisortaqarfiup naammagittaalliut misissuiffigissagaa....
Kangerlussuarmut tikillutit poortukkat nassatatik ammaatiterneqarnikuuppat?Sermitsiaq.AG'mit tusarfigerusuppatsigitmailerit redaktion@sermitsiaq.ag