Inissiat 303 Nuummi iserterfigineqarput
Nuummiinnaq 2011-mi inissiat 303 namminersorlutik oqartussat sanatitaat atorneqalerput
Kollegiani inissiat 94, nalinginnaasumik attartortittakkat 74, inissiat nammineq pigisat 44 aamma suliffinnut atatillugu inissiat 91. Ukioq 2011 Nuummi inissiat taama amerlatigisut atorneqalerput.
- Inissaaleqineq akiorniarlugu suliniarneq aallartissimalerpoq. 2012-imi sanaartorneq nangissaaq, januaarip qeqqani illoqarfinni illussat sanasussarsiuunneqassapput, tamakku Ilulissani, Sisimiuni aamma Qaqortumi sanaartorneqassapput. Taakkua saniatigut ilaqutariinnut illut Aasianni aamma Nanortalimmi sananeqassapput, Tasiilami sanaartorlugit aallarteriikkat saniatigut ilaqutariit illui arfineq-pingasut sananeqassaaq, Jens B. Frederiksen, ineqarnermut, attaveqatigiinnermut angallannermullu naalakkersuisoq oqarpoq.
Naalakkersuisut naqissusiipput, inissiat nalinginnaasumik attartortittakkat Illuut A/S'ip ataani pineqartut, kikkunnit tamanit qinnutigineqarsinnaasut. Inissiamut akiliutissat Namminersorlutik oqartussat attartortittagaataasa allat pisoqalisullu akinginit qaffasinnerussaaq, illuatungaagulli inissiat ataatimoorussamik aningaasartuutaat annertoorujussuunani, imermut kiassarnermullu aningaasartuutit inissiani nutaani avatangiiseq eqqarsaatigalugu suliani
Uani eqqaasariaqarpoq inissiani nutaani ineqarnermut akiliutip iluani siunissami aserfallatsaaliinissamut illuartitsisoqartassammat, taamaasilluni pinaveersinneqassammat maannakkutut ukiut 20-t qaangiuppata aserfallassimasorujussuit meeqqatsinnut kingornussassanngortissannginnatsigit.
- Uannut pingaaruteqarpoq naqissusissallugu illoqarfinni nutarsaaneq pisariaqarluinnartoq ingerlanneqarmat, ineqarneq pillugu anguniagassatut pilersaarut naammassiniarneqassammat aamma atuutsinniarneqassammat. Taamaattumik suliniutit nutaat iluarsaassinernut tunngasu 2012-imi Qaqortumi, Maniitsumi, Aasianni aamma Tasiilami aallartisarneqassapput, Jens B. Frederiksen oqarpoq nangillunilu:
Naatsorsuutigaara blok P'mik isaterinissaq aqqutissiuussissaaq blokkersuit qaqortut sinerissami tamalaaniittut isaterlugit nutaanik avatangiisinut tulluarnernik taarserneqarnissaannut.