Laserlys timmisartut tungaannut

Nuummi politiit erseqqissaatigaat laserlys'it atorlugit timmisartunik eqqorniaasarneq pinnguarnerusoq ulorianarluinnartoq

Laserlys'inik atuineq pissanganartuuvoq, kisianni Nuummi politiit arlaleriarlutik meeqqat laserlys atorlugit timmisartunik eqquiniartartut oqaaqqissaartariaqarsimavaat. Assi: Sermitsiaq.AG

Meeqqat arlalippassuit sapaatip akunnerani uani Politiinit pingaaruteqartumik oqaloqatigineqarsimapput. Taama Nuuk Politi tusagassiivinnut ilisimatitsivoq.

- Arlaleriarluni saaffiginnittoqarpoq, qinngorneq qorsuk sakkortooq atorlugu timmisartut biilertullu inuusuttunit toraarneqartarsimasut. Meeqqat taamaasiorsimasut arlallit angajoqqaavilu oqaloqatigineqarput. Oqaatigisariaqarpoq, laserit tamakku biilertut timmisartortartullu tungaannut seqersarneq ulorianartorujussuarmik kinguneqarsinnaammat. Meeqqat laseriutillit angajoqqaavisa tamanna ilisimasariaqarpaat aammalu ajornanngippat meeqqatik oqaloqatigalugit, taama pinnguarnerup kinguneranik susoqarsinnaaneranik, Nuummi Politiini pigaartoq Kasper Berthelsen ilisimatitsivoq.

Oktobarimi Danmarkimi eqqartuussisoqarpoq, angutip 60-inik ukiullip Roskildep eqqaani annaasiniartartut helikopterianni aquttut laseriminik akornusersorsimammagit. Angut ulluni 30-ni parnaarunneqartussanngorlugu pineqaatissinneqarpoq, 40.000 koruuninik akiligassinneqarluni, DR.dk allappoq.

Powered by Labrador CMS