Kommunefogedit aningaasarsiaat aaqqinneqassapput
Naalakkersuisut neriuutigaat piffissami qaninnerpaami kommunefogedit aningaasarsiaat aaqqiiffigineqassasut
Nunamut Namminermut, Pinngortitamut Avatangiisinullu Naalakkersuisoq ilisimatitsivoq 2012-mi ukiup affaata siulliup ingerlanerani kommunefogedit akissaasersornerisa aaqqiiffigineqarnissaat Kalaallit Nunaanni Politimesterimit sulissutigineqarniarnera Naalakkersuisut naammagisimaaraat.
Tamanna tusagassiivinnut nalunaarutigineqarpoq:
- Inatsisartut aamma Naalakkersuisut ukiut arlallit ingerlanerini ataatsimiittarnerminni kommunefogedit akissaasersorneqarneri pillugit ajornartorsiut oqallisigisarpaat uangalu inatsisinik atortitsinermut Naalakkersuisutut akisussaasutut ajornartorsiut pillugu Kalaallit Nunaanni Politimesteri, taamanikkut Inatsisinik atortitsinermut ministeri Lars Barfod kingullermillu Inatsisinik atortitsinermut ministeri nutaaq Morten Bødskov ulloq 4. november 2011-mi ataatsimeeqatigisarpakka. Ataatsimiinnerni taakkunani naalagaaffiup tungaaniit suliniuteqartoqarnissaa ujartortarsimavara, pingaartumik kommunefogedit akissaasersornerinut tunngasut kiisalu nalinginnaasumik sulinermi atugaat pillugit, pingaartumik inunnik tigummigallakkanut kommunefogedit nammineq illuminnik atuisarnerat, taamatut oqarpoq Naalakkersuisunut ilaasortaq Anthon Frederiksen.
- Eqqartuinerni aaqqiissutissamik nassaartoqarnissaa tamatigut siunertaasarsimavoq, taamaalilluni naalagaaffiup akisussaaffigisaanut Namminersorlutik Oqartussat akiliinatik; soorlu aamma naalagaaffimmiit Namminersorlutik Oqartussat tigusimasaannut aningaa-sartuutinut naalagaaffik akiliiumaneq ajortoq, naggasiivoq Naalakkersuisunut ilaasortaq Anthon Frederiksen.
Kommunefogedit najugaqarfimminni innuttaasut amerlassusaat naapertorlugit aningaasarsiaqartinneqarput. Qaammammut 540 koruunit missaat.