Anthon F'ip Pituffik misissuiffigeqquaa - aammaarluni
Pituffiup eqqaani qinngornernik ulorianartunik peqanngilaq, Risø DTU'p nalunaarusiami nutaami tusarliussivoq. Taamaattoq Anthon Frederiksen, aammaarluni misissuisoqarnissaanik piumasaqaqqippoq
Kalaallit Nunaata Kitaani Pituffimmi sakkutooqarfiup eqqaaniikkaanni qeqertamiluunniit allamiikkaluaraanni arlaannaalluunniit navianarnerunngillaq. Taama Risø DTU, Statens institut for Strålingshygiejne (qinngornerit peqqinnassutsimut sunniutaannik naalagaaffiup ataani suliallit) aamma Peqqissutsimut Pisortaqarfimmeersut, ukiut arlallit sukumiisumik misissuereerlutik inerniliipput, Sundhedsstyrelsimit tusagassiivinnut nalunaarummi allassimavoq.
ing.dk. taama allappoq.
Taamaakkaluartoq Anthon Frederik kingumut Pituffimmi misissuisoqarnissaanik piumasaqarpoq.
Nunamut namminermut, pinngortitamut avatangiisinullu naalakkersuisoq Anthon Frederiksen erseqqissaatigaa, Risø DTU'p qinngornernik ulorianartunik Pituffiup eqqaani nunap qaavani misissuinermi, aamma qinngornerit qanoq annertutigisimaneranik naliliinermi kaammattuutigineqartoq, aammaarluni sumiiffissiuisoqassasoq aamma uuttortaasoqassasoq.
- Isumaqarpunga pingaaruteqartoq aammaarluni misissuisoqarnissaa. Maluginiarpara, sumiiffiit aalajangersimasut ilaanni qinngornernik ulorianartunik peqarnera uuttorneqarsinnaasimasoq, taamaanilu uumasut nujuartat qinngornernik ulorianartunik mingutsinneqarsimasinnaasut, pingaartumik Narsaarsuup immikkoortuata ilaanni. Taamaattumik Pituffiup eqqaani misissuisoqaqqinnissaa pisariaqartutut tunngavissaqarsoraara, qulakkeerniarlugu mingutsitsineqanngitsoq. Innuttaasut uumasunik innarlersimasunik naammattuuisut tunniussivissaanik pilersitsisoqareerpoq, uumasut misissorneqarsinnaaqqullugit. Risø DTU saaffigereerpara suliaq pillugu naalakkersuisut naalagaaffiullu suleqatigiinnerata ingerlaqqinnissaa qulakkeerniarlugu.