Piniartut nannuttaminnit misissugassiisalissapput
Naalakkersuisunut ilaasortaq Ane Hansen aalajangerpoq nannunniat januaarip aallaqqaataa 2012 aallarnerfigalugu, nannuttamik oqaannit aamma kigutaannik mikisumik misissuganik peersisoqartalissasoq
Nannut kigutaasa oqaasalu misissuiffiginerisigut aammalu dna'visa misissornerisigut siunissami piujuaannartitsilluni nannunniarsinnaaneq qulakkeerniarneqassaaq.
Taamaattumik Ane Hansen, piniarnermut naalakkersuisoq aalajangerpaa nannunniat 2012-imi januaarip ulluisa aallaqqaataaniit nannuttamik oqaanit kigutaanillu misiligutissanik tigusisalissasut.
- Misiligutissat nanoqatigiinnik (pissuseqatigiinnik) Canadami Nunavumik avitseqatigisatta aqunneqarnissaat pillugit isumaqatigiissummik malitsitsiniaanermut pingaarutilerujussuupput. Tamatumani siunissami nanoqatigiinnik piujuaannartitsinissaq nungusaataanngitsumillu piniarneqarnissaasa qulakkeerneqarnissaat siunertarineqartoq, Ane Hansen allappoq.
Nannut qanoq ukioqqortutiginersut aamma nanoqatigiit tamarmiusut ukiuisa agguataarneqarnerat nanoqatigiit qanoq innerannik oqaluuttuutissagaatigut kigummit misiligutit takutissavaat. Oqqamit misiligutit DNA-vi misissueqqissaariffigineqassapput, taamaalillutik nanoqatigiikkuutaat qanoq imminnut attuumassuteqarnersut ilisimatusartut paasisinnaaniassammassuk. Misiligutit aamma Qimusseriarsuarmi aamma Kane Basin-imi nannut qanoq amerlatiginnerannik naatsorsuinernut ilanngunneqassapput, nanoqatigiit tamakku Nunavullu avillugit pisuussutigaavut uumassusillit.
Misiligutissanut puussamik ruujorimik aamma quppersakkamik paasissutissanik imalimmik, tassani misiligutissat qanoq tiguneqassanersut takuneqarsinnaavoq, Pinngortitaleriffimmit nassiussuisoqarpoq. Quppersagaq aamma uannga aanneqarsinnaavoq: Nannut - Nannuttanit misiligutissanik katersineq
Misiligutissat nalunaarsuilluni immersuiffimmik immikkut ittumik ilallugit kommunimut tunniuneqassapput tamatumalu kingorna misiligutissat kommunimit Pinngortitaleriffimmut nasissiunneqassapput.
Aalisarnermut, Piniarnermut Nunalerinermullu Naalakkersuisoqarfimmiut aamma Pinngortitaleriffimmiut ikiuuttussanut qujapput aammalu katersinissaq annertunerusumik paasisaqarfiginiaraanni uunga iseqqusisoqarluni: www.natur.gl.