Parnaarussat: - Kalaallimik ilisimalimmik

Kalaallit 19-it Herstedvesterimi parnaarussat pingasunngormat kalaallisut juullisiortinneqartut: - Kissaatigaarput kalaallisut oqalussinnaasumik psykologeqarnissarput

Herstedvesterimi parnaarussiviup oqaluffiani juullerpalaartitsisoqarpoq. Assi: Roth Herstedvesterimi juullerpalaartitsineq pingasunngormat ingerlanneqarpoq. Assi: Roth MIK erinarsoqatigiit ukiorpassuarni Herstedvesterimi parnaarussivimmi kalaallinut erinarsoriartarput. Assi: Roth Herstedvesterimi juullerpalaaq. Assi: Roth

Herstedvesterimi parnaarussivimmi kalaallit juullisiutaat aamma atorneqarput. Qeerlutooq siataq, naatsianik kajortitat rødkålilu sassaalliutigineqarlutik ukioq manna kalaallit 19-it Herstedvesterimi parnaarussat juullisiortinneqarmata. Pisarneq naapertorlugu nakkuginnittut erinarsoqatigiillu MIK, parnaarussivimmi kalaallit immikkoortortaanni juullisioqatigiinnermi qaaqqusaapput. Poortukkanik tunioraattoqareermat orpik kaavinneqarpoq.

Inimi nuannisartoqarpoq, kisianni soorlu suna tamarmi arlaannik ikkarnartoqartoq:

- Kalaallit Nunaannut nuunnissarput tamatta qilanaaraarput, 42-nik ukiulik ukiut arfineq-pingajussaat parnaarussaaq oqarpoq. Taassuma parnaarussaaqataasalu oqaluffimminni kalaallisut unnussiuaaqatigiinneq nuannaarutigigaat ersarippoq.

Lars Joelsen, 51-inik ukiulik Nuummeersoq ukiut arfinilissaannik peqqarniitsumik pinngitsaaliisimanini pillugu parnaarussaavoq. Soqutigineqanngitsutut misigisimavoq kigaatsumillu suujunnaarsagaalluni.

- Ukiut tamaasa inuiaqatigiinnut anillatsikkiartuaartinneqarnissaq neriuutaasarpoq. Siullermik pisortaqarfiup (Pinerluttunik isumaginninnermik pisortaqarfik) pavungarsuaq nersualaarpaatigut, neriuuteqalersilluta ukiulli tamaasa eqqartuussiviup atorsinnaannginnerarluta naqissusertarpaatigut. Ukiut tamaasa qamuuna pakatserujussuarneq misigineqartarpoq suujunnaarsitsisoq, Lars Joelsen oqaluttuarpoq. Joelsenip parnaarussaaqataasalu allat 19-it, naluaat qaqugu inuiaqatigiinni inooqataaqilernissartik.

Psykologi qallunaatut oqaasilik

Karl Eliassenip sakkortuumik pinerluuteqarsimanini 2000-miilli pineqaatississutigaa. Taassuma tarnip pissusaannik ilisimasalimmit qallunaatut oqaasilimmit katsorsarneqarnissani taamaatiinnarsimavaa, paatsooqatigiinnerit amerlavallaartaqimmata.

- Sivikitsuinnarmik tassungartarpunga immitsinnut paaseqatigiissinnaannginnatta, Karl Eliassen kalaallisut oqalussinnaasumik tarnip pissusaanik ilisimasalimmit atorfinitsitsisoqartuuppat katsorsarneqarusukkaluartoq oqarpoq. Tarnip pissusaanik ilisimasalimmik kalaallisut oqalussinnaasumik pisariaqartitsivugut, maannakkutut itsillugu pisariuvallaaqaaq. Suut tamarmik nutserisoq aqqutigalugu ingerlasarput, katatsisoqarsinnaaqaaq, Karl Eliassen oqarpoq.

Powered by Labrador CMS