Pinerluttuliornerit ikileriarujussuartut
Paamiut Asasara suliniutip aallartinnerata kingorna illoqarfimmi pinerluttarnerit 45 procentimik ikileriarneranut peqqutaaqataavoq
- Suliniutip 2008-mi aallartinnerata kingorna pinerluttarnerit 45 procentimik ikileriarput - Kalaallit Nunaanni tamarmi pinerluttarnerit 3 procentimik ikileriartut. Angerlarsimaffinni eqqissiviilliornerit 47 procentimik ikileriarput, Nunatsinni tamarmi 17 procentimik ikilisut. Kalaallit Nunaanni Kisitseqqissaartarfiup 2010-mut allattugaataani Politidirektøri immikkut saqqumilaartinneqarpoq ineriartorneq taanna pitsaasoq pillugu, Heidi Jeremiassen, suliniutip siulittaasuata tullia aamma professor Peter Berliner, ilisimatusarnermik aqutsisoq tugassiivinnut allapput.
Paamiut Asasara illoqarfimmi namminermi naleqartitat takorluukkallu aallaavigalugit suliutaavoq, maannalu angusat pitsaasumik kinguneqarnerat takussutissaqalerpoq.
Paamiut Asasara illoqarfimmi namminermi najugallit peqatigalugit inuiaqatigiinnik ineriartortitsinermik ingerlatsivoq BikubenFondenip ukiuni tallimani aningaasalersugaa, aappaagu 2012-imi naammassineqartussaq. Suliniut nunarsuarmi tamaginnit malinnaaffigineqartoq professor Peter Berlinerimit aqunneqarpoq, ukiullu tamaasa suliniummi anguneqartunik nalilersuinermik suliaqartoqartarluni.
- Inerniliunneqarsinnaavoq Paamiuni pinerluttarnerit ikileriarujussuarmata, suliniummi anguniarneqartoq tassa ukiut tallimat ingerlaneranni pinerluttarnerit 50 procentimik ikileriaateqarnissaat, suliniutip ingerlanerani ukiut siulliit pingasut anguneqartoq politiit aamma innuttaasut suliniuteqarnerisigut aammattaaq sammisaqartitsinerit Paamiut Asasarap aallartissimasai illoqarfimmi ilaqutariinnut meerartalinnut aamma inuusuttuaraallutik anaananngortartunut kiisalu meeqqanut inuusuttuaqqanullu.
- Innuttaasut aammalu inunnik sullissisut apersorneqarnerani ilaatigut oqaatigaat Paamiut Asasara peqqutaaqataalluni illoqarfimmi ineriartorneq pitsaasoq aammalu Paamiut siornatigumut naleqqiullugu najugaqarfigissallugu toqqissisimanarnerulersimasoq, Heidi Heidi Jeremiassen, suliniutip siulittaasuata tullia aamma professor Peter Berliner, ilisimatusarnermik aqutsisoq tugassiivinnut allapput.