Umiarsuaq naatsitanik avannaaliaassisoq
Umiarsuit tikittuaannalerneri Pisiffimmi pisiniat iluaqqutigaat
Pisiffik A/S’p avannaani pisiniarfii ukioq naallugu pisiassanik nutaanik pilersorneqalissapput.
Ukiut 15-it matuma siorna diskobugti tamarmi sikugaangat aqqusinersuartullusooq qaqortutut tamanna isikkunittarpoq. Tamanna soorlu naluneqanngitsoq maannakkut allanngoqaaq, Søren Olsen Damgaard HR & Attaveqatigiinnermik Pisiffimmi sulialik tusagassiutinut allappoq.
Pisiffiup pisiniarfiisa avannarpasinnerpaamiittut Aasianni aamma Ilulissani ukiortaaq aallarnerfigalugu sapaatip akunneri tamaasa ataasiarlutik umiarsuarmit tikinneqartalissapput ukioq naallugu. Ileqquulersussaq taamaattoq ukiualuit matuma siorna takorloorneqarsinnaanngilaq, taamani ukiuunerani pisiassat timmisartuunneqartarput taamalu akiinut angallassineq sunniuteqartarluni.
Sikunialissanngippat umiarsuit angalanissaasa pilersaarutaat iluatsissapput, taava Aasiaat aamma Ilulissat pisiassanik nutaanik soorlu naatsitanik, qallersuutinik ass. aasaaneranituulli pilersorneqalissapput.
Aasiaat aamma Ilulissat ataatsimut 8.000-nik innuttaqartut sinerissami pisiniarfiup neqeroorutaasa assinginik aviisini takuneqartartunik pisinniarsinnaassapput. Tamanna pisiniartunut aamma Pisiffik A/S'imut siuariaataasaaq. Pisiniartut pisiassamik ukiuugaluartoq nutaajuneri aamma siornatigumut naleqqiullugit akikinneruneri malugissavaat. Pisiffik A/S'imut pisinianut pitsaanermik sullissinermik aamma toqqorterivinnik pisariaqartitsinerup annikinnerulerneranik kinguneqassaaq.