Sisimiuni timersortartut uummataat illersorpaat
Kalaallit Røde Korsiat sumiiffinni inuppassuit katersuuffigisartagaanni, soorlu timersortarfinni uummammik aallartitsissutinik peqartoqalernissaa anguniarpaa
Maniitsumi illoqarfiup timersortarfiani uummamminik unittoornerminik alianartumik toqusoqarnerata kingorna Kalaallit Røde Korsiata nuna tamakkerlugu siulersuisuisa Nunatsinni timersortarfinnut sunngiffimmilu aqutsisoqarfinnut tamanut uummammik aallartisaammik / AED-mik pisinermi immikkut ittumik iluanaarnartumik neqeroorusiornissaq aalajangiuppaa.
Qeqqata Kommuniani timersornermut siunnersortip Karl Kasper Olsenip neqeroorut erniinnaartumik akueraa, uummammik aallartisaatinik arfinilinnik inniminniilluni Sisimiuni Minihalimi, arsaattarfiup eqqaani, Sisorarfimmi, SSP-mi Langrendertartut klubbiata illuanni, aamma Qajaq-p klubbiata illuani, kiisalu Kangerlussuarmi timersortarfimmi inissinneqartussanik.
Taamatuttaaq Maniitsup Timersortarfiata timersortarfimmi toqusoqarnera ilumoorullugu ingerlaannarluni uummammik aallartisaammik inniminniivoq.
Uummammik aallartisaatip pisiarinerani sulisunut uummammik aallartisaatip / AED-p atornissaanik nal. akunnerani pingasuni pikkorissartitsinissamik neqeroorut ilaatinneqartarpoq.
Inuit allat inuunerannik peqqissusaannillu KRK aningaasarsiornissaminik soqutigisaqanngilaq. Siulersuisut taamatut iliuuseqarniarneq inuit amerlasuut najuuttarfiini sumiiffinni amerlanerpaanik uummatinik aallartisaatit inissittariaqarneri pillugit oqallinnissamik aallartisaatissatut isigaa.