Sydafrika qorsooqqik

- Avatangiisit pinngortitarlu silap pissusianut allanngorsimasumut kinguaariit tullinnguuttut isumannaarneqarnissaannut tamatta peqataassaagut, Anthon Frederiksen isumaqarpoq

Anthon Frederiksen, Sydafrikami COP17-ip ingerlanneqarneranut atatillugu piujuartitsinissamik suliniutillit arlallit pulaarpai. Assi: Namm. Oqart.

Nunamut Namminermut, Pinngortitamut Avatangiisinullu Naalakkersuisup Anthon Frederiksenip, Afrikami Kujallermi Durbanimi FN-ip ataani nunat tamalaat silap pissusia pillugu ataatsimeersuarneranni, COP 17-imi, peqataanermini periarfissaq iluatsillugu avatangiisinut iluaqutaasumik suliniutit aamma nunaqqatigiinnut iluaqutaasumik nungusaataanngitsumik aningaasarsiornikkut ineriartorneq isiginiarlugit silap pissusianut tunngatillugu naleqqussaanerit arlallit takuniarpai, Nunamut Namminermut Pinngortitamut Avangiisinullu naalakkersuisoqarfik tusagassiivinnut nalunaaruteqarpoq.

Sapaatip akunnerata aallartinnerani UNFCCC-p ataani suliniut CDM-imik taaneqartartoq (Clean Development Mechanism) eqqaavissuaq ”Bisasar Landfill site” takuniarpaa. Tassani eqqakkat uumassuseqartunit pisut suujunnaariartortinneqartarput methanimut karbondioxidimullu gassinngortinneqarlutik, tamatumalu kingorna nunaqqatigiinnut iluaqutaasumik kallerup inneranik tunisassiornermut gassi atorneqartarluni.

Anthon Frederiksenip aamma qallunaat aallartitaqarfiat aamma Vestas peqatigalugu Afrikami Kujallermi nukissiornermut ministeriaqarfimmit aaqqissuunneqartumi COP-17-imi anori pillugu isumasioqatigiinnermi Kalaallit Nunaat ilisaritippaa. Isumasioqatigiinnermi ilaatigut Afrikami Kujallermi Nukissiornermut ministeri, qallunaat Silap Pissusianut Nukissiornermullu ministeriat kiisalu Folketingimit qallunaat aallartitaat peqataapput.

Sisamanngormat Durbanip eqqaani nunap immikkoortuata eqqaavissua Anthon Frederiksenimit takuniarneqarpoq, eqqaavissuup eqqaani orpippassuit ikkussoqqinneqaqqissimapput.

Isikkamik arsaannermi nunarsuarmiut pissartanngorniunnissaannut illoqarfittut aaqqissuussisutut Durbanip kissaateqarneranut atatillugu suliniut aallartinneqarpoq, nunap immikkoortuata silap pissusianut sunniuteqanngitsutut inissisisimasutut isigineqarnissaa tassani anguniagaalluni. Suliniummi suliffissaaleqisut angerlarsimaffinni orpileriffiliornerannik ikiorneqarput. Orpiit ikkussugassanngorlugit tuniniarneqartarput. Nunaqqatigiinni taamatut suliaqartitsinerup inuiaqatigiit aningaasarsiornerannut kinguneqarpoq ilinniartitaanerup inuussutissanillu pilersorneqarnerata isumannaannerulerneranik.

Sydafrika aamma Kalaallit Nunaat
- ”Naak pissutsit arlallit Afrikap Kujalliup aamma Kalaallit Nunaata akornanni assigiinngikkaluartut silap pissusianut naleqqussarnermi nunat allat misilittagaat paasisaqarfigissallugit Avatangiisinut Pinngortitamullu Naalakkersuisutut uannut pingaarpoq. Silap pissusiata allanngornera nunarsuarmiut tamarmik akisussaaffigaat tamannalu Kalaallit Nunaanni qanimut takusinnaavarput. Taamaattumik siunnerfeqartumik ataatsimoorluta tamatta suliniuteqartariaqarpugut, Anthon Frederiksen tikeraareernerup kingorna oqarpoq.

- Pinngortitap avatangiisillu isumannaarnissaannut siunissamut ungasissumut silap pissusianut naleqqussarnissamut iliuuseqarnissarput pingaarpoq, peqatigisaanillu kulturikkut naleqartitagut isumannaarlutigit allanngutsaaliorlugillu.

-Avatangiisimut iluaqutaasunik suliniutit alakkarsimasakka pikkugeqaakka. Pingaartumik maluginiarpara avatangiisinut iluaqusiisumik suliniutitut taaneqartut pilersaarusiorluarnikkut atorneqarnerisigut qanoq toqqaannartumik inuiaqatigiit aningaasarsiornerannut iluaqusiinerat aamma pinngortitami isumalluutinut atuisinnaanerup pitsaanerulersinnera qulakkeerneqartartoq, Anthon Frederiksen oqarpoq.

Powered by Labrador CMS