Silap pissusaa naalakkersuisut pitsaasumik oqaluuseraat
Kalaallit Nunaata silap pissusaa pillugu isumaqatigiinniarnerni nukittorsarumalluni Danmarkimik isumaqatigiissut nutarterpaa
Naalakkersuisup Jens B. Frederiksenip ippassaq decembarip ulluisa arfineq pingajuanni suleqatini danskeq, silap pissusaanut ministeri Martin Lidegaard, Durbanimi COP 17-imi ataatsimeeqatigaa.
Kyotomi isumaqatigiissutip (2008-miit 2012-imut) atuunnerani Kalaallit Nunaata Danmarkip pisussaaffiinut tapiliussassaat, siunissami annikillisitsinissamut pisussaaffinnut siunniussat kiisalu suleqatigiinnermi ataqatigiinnerit ataatsimiinnermi oqaluuserineqarput.
Silap pissusaanut ministeri Lidegaard aamma Naalakkersuisoq Durbanimi ataatsimiinnerminni inuppalaartumik pilersitsiviulluartumillu oqaloqatigiipput. Silap pissusaanut ministerit marluullutik – pingaartumik kalaallit tungaanniit – maannakkut piffissami pisussaaffeqarfiusumi anguniagassat, kiisalu UNFCCC-mi isumaqatiginninniarnermi maannakkut ingerlanneqartumi siunnerfiit oqaluuseraat.
- Nuannaarutigaara oqaluttuarisinnaagakku, paasissutisseeqatigiittarnerput paasiniaaqatigiittarnerpullu nukittorsarniarlugu suleqatigiinnermut isumaqatigiissusiorniaratta. Taamatut isumaqatigiissuteqarnikkut Kalaallit Nunaata nunat tamalaat akornanni silap pissusaa pillugu isumaqatiginninniarnernut peqataanera nukittortinneqassaaq, taamatullu aamma Naalagaaffeqatigiit ataatsimoorlutik inissisimanerat nukittorsarneqassaaq tamatigoortunngortinneqassallunilu, Naalakkersuisoq Jens B Frederiksen oqarpoq. Kalaallit Nunaata nunat tamalaat akornanni isumaqatiginninniarnernut peqataasarnera nukittorsarniarlugu suliassaqarfinnut ministerit akunnerminni suleqatigiinnissamut isumaqatigiissusiorsinnaanerat Namminersornermut inatsimmi § 13-imi (kap. 4) periarfissinneqarpoq.
Aamma Sermitsiami sapaatip akunnerani uani saqqummersumi COP17 pillugu atuarsinnaavutit, tassa Kalaallit Nunaata tunisassiornerup ineriartorneranik unitsitsisinnaanini qunusaarutigaa.
Manna aqqutigalugu aviisi pisiarisinnaavat.