Johan Davidsen Nissebandenimi
Kalaallit arlallit "Nissebanden i Grønland" peqataaffigaat
"Nissebanden i Grønland" decembarip ulluini tv'ikkut ullut tamaasa aallakaatinnera malinnaaffigigaanni paasinarpoq juullimut mappersakkami tassani nuannarineqarluartumi, kalaallit ilisarnartut arlallit peqataasut.
DR'ip Juullimut mappersagaa 1980'ikkut naajartornerani suliarineqartoq siullermik takutinneqarpoq 1989.
Taamaattoq ippassaanikkunni "Nissebanden i Grønland" aallakaatinneqarmat niviarsiarannguaq Sisimiuni aatsaat aallakaatitassianik taakkuninnga isiginnaarngaartoq nillermat, Johan'iunaa?
Ilumoortuaraalluni: Illoqarfiummi sheriffia - imaluunniit politikommisæriat aamma Sisimiut politeqarfiani pisortaq Johan Davidsen, inuusunnerulluni allakkerisartuummat, allakkerisut qamutaat atorlugu juullip inuata angerlarsimaffiani kongsgårdimi Uummannap eqqaaniittumi allakkanik aatsimmat nissebandikkunnit tikilluaqquneqartoq.
Johan Davidsenip nammineq imminut takoqqinnini nuannaraa.
- Niviarsiarannguaq nuliama jornguata pania oqaluttuarsimavoq, Johan allakkerisartuugallarmat Nissebandikkut ilagigai takusimallugu.
- Niviarsiarannguup nalunngilaa ullumi politiitut atorfeqartunga, Johan Davidsen oqaluttuarpoq.
- Juulleriartorpoq ilisarisimasattalu akornanni meeqqat allakkersartuusimaninnik takunnissimanerat nuannerpoq, Johan Davidsen oqarpoq.
"Nissebanden i Grønland" aallakaateqqinneqarpoq 1993 aamma 2002.
"Nissebanden i Grønland", peqaaffigisimagukku oqaluttuassat tusarusupparput assiuteqaruillu uunga saaffiginnigit: redaktion@sermitsiaq.ag