Angutit atisaannik niuertarfik

Pingasunngormat nunatsinni nittartakkatigut angutit atisaannik niuertarfik ammarpoq.

Eskiman.gl saqqummerpoq Kalaallit Nunaanni malunniuteqarniarlutik, naak atisaarniat allat annertunerusumik misiliiffiginikuunngikkaluaraat. Atisaarniarfiit amerlasuut illoqarfigisartik kisimi niuerfiginiarlugu ingerlattarpaat. Eskiman.gl nittartakkatigut atisaarnialernerminik tamanna atorluarniarlugu periarfissamik allamik ammaavoq, sineriak tamakkerlugu nittartakkatigut tuniniaalernermigut.

- Nioqqutissat amerlassusaat tunngavigalugit nittartakkatigut pisiniarfik Smartguy unammillernianngilarput unammillersinnaannagulu, Smartguyip qinigassaatai amerlasoorujussuummata. Kisiannili unammilliutigisinnaallugu suliffeqarfik kalaallisut tunngaveqarnera. Taamaammat pisisartugut kalaallisut qallunaatullu kiffartuussinnaallutigit, nittartagarpullu kalaallisut qallunaatullu allaqqanera unammilliutigilluarsinnaallugu – taassumalu pingaassusaa naleqartilluarparput, taamatut oqarput nittartakkamik Eskiman.gl-imik pilersitsisut Ivik Motzfeldt aamma Ingo Hansen.

Nioqqutissat assigiinngitsut – annermik angutinut, qinigassaasinnaasut ukiuni arlalinni nunatsinni killeqarsimapput, nunatsinniillu amerlapput Qallunaat Nunaannut feeriarnertik iluatsillugu atisanik niuerniartartut.