Pissakinnerit aningaasannatsinneqarput

Kalaallit Røde Korsiat Ilulissat, checkimik 8.208,00 koruuninik nalilimmik tunisittoq

Peter Frederik Olsen, Ilulissat Center Markedimit checki Rachel Reimer Jensen, Kalaallit Røde Korsianeersumut tunniuppaa. Assi: Ilulissat Center Marked

Aningaasat katersorneqarput Ilulissani Center Markip pisiniartartuisa kaffiguunik pisinerinit kiisalu puukunik utertitsinerinit. Taakkunannga tunisanit isertitat tarmik peqatigalugit Kalaallit Røde Korsiata Ilulissani pissakinnernut suliniutaanut tapiutitutm Arctic Import, Ilulissani Center Markedimik piginnittoq tusagassiivinnut allappoq.

Kalaallit Røde Korsianit checki Ilulissat Center Markedimit tunniunneqartoq qujarunneqaqaaq, taanna ukioq manna Ilulissani juullimut tuniniaasitsinermut atatillugu tunniunneqarpoq.

- Puiaasanit utertitassanit aamma kaffimik tuniniaanermit isertitat inunnik allanik ikiuiniarnitsinnut tapertaapput. Illoqarfimmi ilaqutariit pissakilliortut juullimut koorimik tunineqassapput, Rachel Reimer Jensen, Kalaallit Røde Korsiat tapersiinermut qujaniarluni oqaaseqarpoq.

Puiaasat utertitat nalinginik tunniussinikkut ikiuunnerup saniatigut, pisiniartartut kaffiguumik pisiortornerat iluanaarutaalluarpoq, kaffigooq puusiaq ataaseq tunineqaraangat 1 koruuni ikiuiniaqatigiinnut tuttarmat. Tamatuma saniatigut Arctic Importip suliffeqarfinnut pisiniartartunullu allanut tunisaannit 1 koruuni tunniunneqarpoq.

- Pisiniartartutsinnit tapersersorluarneqarnerput tulluussimaarutigaarput, septembarip aallaqqaataanit puiaasat utertitamik nalingat Kalaallit Røde Korsianut tunniussinnaasimavaat namminneq kaasarfimminnut ikiinnarnagu. Puiaasanit piffissap taassuma iluani 2.208,00 koruunit katersorpagut. Kusanarluinnarpoq, Peter Frederik Olsen, Ilulissat Center Markedimi pisortaq oqarpoq.

Ilulissani Center Markedimi puiaasanik utertitanit aamma kaffigooq tuniniarneranit iluatsitsineq nangeqqinneqassaaq.

- Puiaasanit utertitanit Kalaallit Røde Korsianut katersinerput nangeqqissavarput, tamatuma saniatigut kaffigooq puusiaq tunigaangatsigu tapiisassaagut. Uagutsinnut pingaaruteqarpoq ikiuiniaqatigiit illoqarfitsinni suliniarnerannik tapersiisarneq. Pisariaqarpoq aamma tupinnaqaaq pisiniartutta tapersersuilluarnerat. Tamanna qujassutigiinnarsinnaavarput, Peter Frederik Olsen oqarpoq.

Powered by Labrador CMS