Skatteministeriap siunnersoortaasimasoq unnerluutigaa
Nutaarsiassaqartitsivik Thorningip akileraarutaasa pappiarartaanik neqeroorfigineqarpoq. Skatteministeriaqarfiup siunnersortaasimasoq Københavnip politiivinut unnerluutigaa
Skatteministeriap akileraartarnermut ministeriusimasup Troels Lund Poulsen (V) siunnersortigisimasaa aamma spindoktorimik taaneqartartoq Peter Arnfeldt politiinut unnerluutigaa, Helle Thorning-Schmidtip (S) akileraartarneranut tunngasut pappiaqqanik isertuussanik siaruarteriniarsimanerarlugu.
Politiinut unnerluussummik tunniussineq Ekstra Bladet'ip allaaserisaata kingorna pivoq. Ekstra Bladet allaaserimmagu Peter Arnfeldtip ukiup ataatsip matuma siorna akileraarutinik misissuisitsinermit immikkoortut ilaat aviisimut tunniunniarsimagai, kingorna qinersinerli sioqqullugu B.T'p allaaserigai. Paasissutissat aallaqqaamut Skatteministeriaqarfiup nalileraluarpai politiillu oqaloqatigiissutigissallugit.
Københavnimi politiinut allakkami Skatteministeriaqarfimmi pisortaq Jesper Skovhus Poulsen allappoq, aviisimi atuarsinnaallugu Peter Arnfeldt, pappiaqqat Helle Thorning-Schmidtip taassumalu uiata Stephen Kinnockip akileraartarnerannut tunngassuteqartut isertuussassaasullu ingerlateqqinniarsimagai.
- Skatteministeria tamanna tunuliaqutaralugu maanna Københavnip politiivi qinnuigaa suliamut tunngasumi pisariaqartitaq naapertorlugu iliuuseqaqqullugit, Jesper Skovhus Poulsen allappoq.
Ekstra Bladetip paasissutissat neqeroorutaasut atorumasimanngilaat, pissutigalugu Peter Arnfeldtip akileraartarnermut suliami aalajangiussat ilaannaat atuffassissutigerusussimammagit, inerniliussat tamakkiisut takutinnagit.
Skatip septembari qaammat qinersineq sioqqutitsiarlugu socialdemokratit siulittaasuanut tunngasut pappiaqaat - taamani statsministerissatut piukkussap - B.T'mut tunniunneqarsimagunarneri politiinut nalunaarutigai. Taama nalunaaruteqarneq pinerluttaalisitsinermi paragraf 152 innersuussisoqarpoq. Paragrafip taassuma paasissutissanik isertuussassanik tunniussinermut tunngavoq.
Taamani oqaatigineqarpoq Helle Thorning-Schmidtip uimi tuluusup akileraartarnermi ilanngaatigisartagaanik atorluaasimasoq, Skatimi ukiorpanni kukkusoqarsimanera pissutigalalugu. Kukkunerli 2000-2005 pisimavoq. Taamaattumik pineqartoq pisoqalivallaarsimavoq aningaasallu iluanaarutaasimasut utertinneqarsinnaanatik.
Paasissutissanik isertuussanik tunniussisimaneq pillugu Københavnimi politiit suliamik aallartitsereernikuupput. Tamatuma saniatigut naalakkersuisut ataatsimiititaliamik misissuisussamik pilersitsinikuupput pisortat akileraarnermut tunngasumik sulisimaneranik paasiniaasussamik.