Kalaallit Nunaat juullimi pilluarit
Vejlemi ukioq manna Kalaallit Nunaannut juulllimut pilluaqqusinermi inuit 1600 peqataapput
Sila juullerpalaarpallaanngilaq illorsuulli iluani Vejlemi DGI-Huset, juullerpalaarneq qularutissaanngilaq, kalaallit peqatigiiffiisa ataatsimut peqatigiiffiat Inuit arfininngornermi Kalaallit Nunaannut juullimut inuulluaqqusineq aaqqissuummassuk.
Ileqqoq naapertorlugu Sct. Nicolaip oqaluffiani palasi Jens-Kristian Kleist oqaluussisoralugu naalagiaqatigiinnermik allarnerneqarpoq. Illorsuarsuarmi oqalugiarnerit, erinarsoqatigiit, tussiaqatigiinnerit aammalu napparsimasut, parnaarussallu, ilinniartut aamma efterskolertut sinnerlugit inuulluaqqusisoqarpoq tamarmik KNR-TV'imit immiunneqartunik juullliaqqami aallakaatinneqarsinnaanngorlugit.
Nalliuttorsiualaarnermi tupaallatsitsisuuvoq qulinik ukiulik Kim Chemnitz, Århusimeersoq supputaasarluni appimmat. Kim ukiuni pingasungajanni suputaasamik nipilersortarpoq. Taassuma aliikkusersuinera nuannaajallaatigineqaqaaq ersaattaattullu "Inequnaq" kisiat nipigaat.
Tamatuma kingorna nunatsinnit sumiiffinnit assigiinngitsuneersut ataatsimoorlutik nunatsinnut aalatereqatigiissinnaapput, TV-millu aallakaatitassamik immiussisut ussanneqaqaat. Orpimmik juullip inuia mamakujuttunik agguaassivoq.
Kingumut Inuit aaqqissuussinerat iluatsilluarpoq naatsorsuutigineqarluni inuit 1600 arfininngormat orpiliaqataasut.