Nunarput amerlanerusunik saarullittassinneqarpoq

Ruslandimik aalisarnermik isumaqatigiissut nutaaq

Russit tunumi kitaanilu amerlanerusunik qaleralittassinneqarput. Assi Sermitsiap toqqorsisivanit

Aalisarnermut, Piniarnermut Nunalerinermullu Naalakkersuisoqarfik decembarip 2-anni 2011 2012-imut Nunatta Ruslandillu akornanni aalisarnermut isumaqatigiissuteqarpoq. Taamatut tusagassiorfikkut nalunaarutikkut paasissutissiivoq Aalisarnermut, Piniarnermut Nunalerinermullu Naalakkersuisoqarfik.

Isumaqatigiissut tunngaveqarpoq Nunatta Ruslandillu aalisarnermut isumaqatigiissutaannik marsip 7-anni 1992-imeersumik.

2012-imi Nunatta Ruslandillu akornanni aalisarnikkut attuumassuteqarfissanik isumaqatigiinniarnerit Københavnimi atorfilinnit ulluni decembarip aallaqqaataani aappaanilu 2011 ingerlanneqarput.

Isumaqatigiissutikkut nunatta russit imartaanni russillu nunatta imartaani 2012-imi aalisarnissat tunngavilerneqarput.

Ukioq manna Nunarput siornamut sanilliullugu saarullinnik 300 tonsinik amerlanerusunik pisassaqarpoq, Nunattalu kullerinik pisassai allanngortalik 1.500 tonsiupput.

Rusland 2012-imi avataani 1.200 tonsinik suluppaagattassinneqarpoq, siorna suluppaagartassai 3.350 tonsiusimallutik. Tamatuma saniatigut Rusland Tunumi 1.375 tonsinik Kitaanilu 1.775 tonsinik qaleralittassinneqarpoq.

Inuussutissarsiortut aallartitaat naalakkersuisoqarfillu naliliipput Nunatta Ruslandillu akornanni isumaqatigiissut nunanut marlunnut naleqarluartoq, 2012-imilu pisassanik taarseeqatigiinneq naammaginartuusoq. Ruslandimik isumaqatigiissut kingusinnerusukkut naalakkersuisunut saqqummiunneqassaaq akuersissutigisassatut.


Powered by Labrador CMS