Juullertinnagu anisitaasussat
Ilaqutariit 30-t juullertinnagu iniminnit anisitaanissaminnik ulorianartorsiortinneqartut ikiornissaannut Jens B. Frederiksen nangaavoq
IA tunuliaqutaralugu Inatsisartunut ilaasortap Juliane Henningsenip attartortut anisitaasut inisseqqinneqartarnerat pillugu naalakkersuisunut apeqquteqarpoq.
Apeqquteqarneranut tunuliaqutaavoq AG-mi novembarip 9-anni 2011 saqqummersumi allaaserisaq, tassani allaaserineqarluni meeqqat inersimasullu 30-t qaammatip naanerani Nuummilu Blok P-mi inissiat inisseeqqittarfiit kingulleq matuneqarpata anisitaassasut.
Ilanngullugu allaaserisami atuarneqarsinnaavoq meeqqanut aaqqiissutissaqartoqartoq, inersimasulli unnuakkut oqquisarfinnut angerlarsimaffeqanngitsullu café-annut innersuunneqartut.
Nuummili unnuakkut oqquisarfik angerlarsimaffeqanngitsullu caféat angerlarsimaffeqanngitsunit allanit ulikkaarneqareersimapput, taamaattumik madrassimik siniffissaqarusukkaanni takkutiaartariaqarpoq.
Anisitsisarneq inisseeqqittarnerlu pillugit A/S INI-p quppernerani nittartakkami, www.ini.gl, ilanngullugu atuarneqarsinnaavoq:
"Inisseeqqiineq. Politiit piumasaraat najugaqartut anisitaasut najugassaqartinneqassasut INI-lu inissianik inisseeqqiffinnik atugassaqartitsissasoq, ilaqutariinnut ataatsinut minnerpaamik inimik ataatsimik imermik kuuinnartumik pilimmik. Inissiat inisseeqqqittarfiit tassaagajupput inissiat ajornerpaat, ilaallu ima ajortigaat attartortinneqarsinnaanatik. Oqaatigineqarsinnaavorli inatsit peqqussullu malillugit INI anisitaasunut inisseeqqiffissamik neqerooruteqarnissaminut pisussaaffeqanngilluinnartoq".
AG- mi sap. ak. 48-mi saqqummersumi ersarissumik allassimanngilaq ilaqutariit 30-t anisitaasimanersut imaluunniit qanoq pisoqarnersoq. Allassimaannarpoq tamanna misissorneqartoq.
Juliane Henningsenip apeqqutaanut ineqarnermut naalakkersuisup Jens B. Frederiksenip akissutaa suli paasiuminaanneruvoq.
Jens B. Frederiksen oqaannarpoq naalakkersuisut Nuummi inisseeqqinnissamik aaqqiissutissarsiortut, tamatumunngalu atatillugu nunaminermik tunineqarnissamik il.il. Kommuneqarfik Sermersooq oqaloqatigineqartoq. Aaqqiissut iluatsilluassappat taanna assigisaaluunniit illoqarfinni allani atorneqarsinnaassaaq.
Ilaqutariit 30-t juullertinnagu anisitaasussat eqqaanngilai.
Juliane Henningsenip aamma paaserusuppaa Naalakkersuisut isumaqarnersut INI A/S inissiaatileqatigiiffiillu allat pisortanit pigineqartut, attartortunut anisitaaasunut atatillugu siunissami inisseeqqinnissamut pisussaaffeqartinneqartariaqarnersut.
Tamatumunnga Jens B. Frederiksen ersarissumik akivoq: Naamik.
- Amerlanerpaatigut pineqartarput attartortut qaammammut ineqarnermut akiliummik akiliinissaminnut aningaasaqarnermikkut piginnaasaqartut, aningaasalli allanut atornissaannut pingaarnerutitsisimasut. Attartortut inuttut sanngiitsut ikiorserneqassapput neqeroorutitigut isumaginninnermut inatsimmiittutigut, najugaqarfimmi attartortut allat artukkernagit, Jens B. Frederiksen nassuiaavoq.
AG 45 pisiarisinnaavat uani: