Radioaktiviusunik qinngornilinnik misissuisinnaanngorput

Greenland Minerals and Energy radioaktivisunik qinngornilinnik misissuisinnaalernertik tusagassiivinnut nalunaarutigaat Inuussutissarsiornermut Suliffeqarnermullu Pisortaqarfiup tusagassiivinnut nalunaarutigereeraa aatsitassarsiorfiup misissuinermik akuersissutaata tunngaviinut ilassummik tunineqartoq nalunaaruteqareernerata kingorna.

Naalakkersuisut aalajangerneratigut Greenland Minerals and Energy A/S aatsitassarsiulernissamut qinnuteqarnissaminut periarfissaqalersoq, aatsitassarsiorfiup nalunaarutigaa.

Naalakkersuisut aalajangernerat pivoq, Greenland Minerals and Energy A/S-imit nalunaarutigineqareersoq, suliffeqarfimmit avatangiisinut, peqqissutsimut akilersinnaassutsimut soorluttaaq inooqatigiinnikkut sunniutissanut misissuinertik naammassisinnaajunnaaraat, misissuinermi radioaktiviusunik qinngornillit ilanngunneqarnissaat akuersissutigineqanngipat.

Tusagassiivinnut nalunaarummi aatsitassarsiorfiup akuersaarpaa, aalajangerneq Naalakkersuisut Qoornumi isumaqatigiissutaata iluaniittoq, tassa uranimik akulinnik piianngilluinnarnissaq.

Tamatuma saniatigut aatsitassarsiorfiup maluginiarpaa aalajangiusimaneqartoq politikki pineqartoq qinersiviup ingerlasup iluani attatiinnarneqassanersoq allanngortinneqarssanersorluunniit aalajangiivigineqassasoq, tamannalu pissasoq paasissutissat peqqissutsimut avatangiisimullu tunngasut nutartikkat saviminissanik tunuliaqutigalugu qinngornermik nalinginnaasumiit annertunerusumik qinngornillit aatsitassarsiornermi attuumassuteqartut misissorneqarneri tunngavigalugit.

Taama aalajangerneq aamma isumaqarpoq Greenland Minerals and Energy A/S-ip Narsami 2012-imi 2013-imilu pilersaarutaasutut sulinissani ingerlateqqissinnaagaa.

Greenland Minerals and Energy A/S-imit maannamut misissuiffigineqarpoq saviminissaq 619 million tonsimik annertussusilik nalunaarsorneqareersimavoq, taannalu 6,6 million tonsimik saviminissanik qaqutigoortunik, 353 pund uran-imik 1,3 million tonsinillu zinkimik akoqarluni. Kuannesuit uranimik thoriumimillu akua maannamut ilisimasat naapertorlugit uranitalinnik piiaanngilluinnarnissamik isummersimanerup killissarititaanit annertunerujussuuvoq.

Naatsorsuutigineqarpoq aatsitassamik piiaaffimmik pilersitsineq 12,5 milliard kruunit nalinginut sanaartorfiussasoq, aatsitassarsiorfillu ukiuni 50-it sinnilinni piiaavigineqarsinnaasoq. Akuersisoqassagaluarpat piiasoqalernissaannut suliffeqarfimmiit naatsorsuutaavoq ukiumut aatsitassat qaqutigoortut 43.000 tonsit tunisassiarineqartarumaartut saniatigullu uranoxidimik tunisassiortoqassasoq.

Greenland Minerals and Energy A/S-imit akilersinnaassusermik.- Avatangiisit pillugit aamma Inooqatigiinnikkut Nalilersueqqissaarnerit kiisalu piiaalersinnaanermut qinnuteqaatit 2012-ip naalernerani nassiutissallugit naatsorsuutigaarput piiasinnaanissamut qinnuteqaatip 2013-ip ingerlanerani akuerineqarnissaa siunertaralugu.