Namminersorlutik oqartussat tillinniarfigeqqippaat
Namminersorlutik oqartussat allaffianni tillinniat marluk ujaarineqarput. Tillinniarneq novembarip 29-anni unnuakkut pivoq
Novembarip 29-ata unnuaani Kalaallit Nunaanni namminersorlutik oqartussat allaffeqarfiat Imaneq 4, Nuummi kingumut tillinniarfigineqaqqippoq.
Kalaallit sanalugaat tillinneqarput eqqumiitsuliortut ilisimaneqartut suliaat, assammiut, ujammit, tajat aammalu iverutit kuultimit nunatsinneersumit suliat tillinneqarput.
Qilalukkat marluk tuugaavi, aggorneqarsimagunartut.
Tillinneqartut ilagaat kuglepen qilalukkap tuugaavanik sanaaq aamma tillinneqarsimagunarpoq, taassuma isui tamarmik kuultiusut, allisitsissut aammalu allakkanik ammaassut.
Angutit marluk tillinniarnermut attuumassuteqarsinnaagunartut ujaarineqarput. Taama Nuummi politiit ilisimatitsipput:
- Angut kalaaleq 20-25 miss. ukiulik, 160 cm takissusilik nalinginnaasumik isikkulik tuattoq, taartunik nujalik takkajaamik kiinnalik. Aappalaartumik kavaajaqarpoq meqqia ilisimaneqanngilaq, kisianni dunjakki saatsoq, qarliit qaamasut koorpuussagunartut.
- Angutip aappaa, kalaaleq 160 cm miss. taartunik atisaqarpoq nasartalimmik kavaajaqarluni.
- Sanalukkanik imaluunniit pinnersaatinik kuultinik akikitsuaqqamik neqeroorfigitikkussi pasinarsinnaasumiillunniit pisiarigussigit - Nuummi politiinut saaffiginneqquneqarpusi imaluunniit 32 14 48 sianerfigisiuk.
Piffissap sivikitsup iluani aappassaa namminersorlutik oqartussat allaffeqarfiat unnuakkut tillinniarfigineqarpoq. Siulleq oktobarip naajartornerani pivoq kingunitsianngua angutit marluk tigusarineqarput.
Ilisimasaqarpit taava redaktion@sermitsiaq.gl saaffigiuk - saaffiginnissutit allanut oqaatigissanngilarput!