Naammagittaalliutit ulapputigineqarput
Kikkut tamarmik sukkanerpaamik sullinneqarusupput, naammagittaalliutit pineqartillugit - kisianni Isumaginninnermi Naammagittaalliuuteqarfiup tamat inatsisitigut eqqortumik pineqarnissat qasukkallaqunngilaat
Isumaginninnermi Naammagittaalliuuteqarfiup suliat 2008-mi ukiut marluk suliarisaraat 2011-imi qaammatit quliinnaat suliarisalerpaat.
Taama nalunaaruteqarpoq Inuussutissarsiornermut suliffeqarnermullu naalakkersuisoq Ove Karl Berthelsen, Ruth Heilmannip paragraf 37 aqqutigalugu apeqquteqaataa, Isumaginninnermi Naammagittaalliuuteqarfiup suleriaasianut tunngasoq akissuteqarfigigamiuk. Apeqquteqaat ilaatigut aallaaveqarpoq, suliassaqarfimmi tassani pilersaarusiassat ukiuni pingasunngortuni neriorsuutaasimasutut saqqummiunneqannginnerat.
- Ajornartorsiut imaasiallaannaq naammassineqarsinnaanngilaq, Ove Karl Berthelsen isumaqarpoq. Taanna aamma isumaqarpoq suliassaqarfiup inatsisit iluannik suliaqarnermi ersiutinik takutitsilluartoq, illuatungaani sullissinerup sivikillisarnissaa anguniarneqartussaavoq, saniatigut pineqartut tamat inatsisitigut illersorneqarsinnaasumik sullinneqarnissaat anguniartussaavarput.
Kisianni Ove Karl Berthelsen, Ruth Heilmann neriorsorpaa, 2009-mi aamma 2010-mi ukiumut nalunaarutit nittartakkami www.sullissivik.gl kingusinnerpaamik 2012 aallartippat ivertinneqarsimassasut.
Taassuma saniatigut ilisimatitsivoq:
- inatsisilerituut pingasut allatseqarfimmi sulisorineqartut
- 2008-mi suliat ingerlaartut 800, maannakkulli suliat 230 missaanniittut
- 2008-mi naammagittaalliutit nutaat 410 takkussimasut, ukioq mannalu suliassat nutaat 216 takkuttut
- 2011-mi allaffissornermut aningaasartuutit 2.041.000 koruuniupput
- suliassat amerlanerpaat pisortat ikiorsiissutaanut aamma utoqqalinersianut/siusinaartumik soraarnerussutisianut tunngasarput.